Josephine Nymand Pinngortitaleriffimmi pisortanngussaaq Saqqummersinneqarfia 06.06.2023

Gert Mulvad, Pinngortitaleriffiup siulersuisuini siulittaasoq ippassaq Josephine Nymandip pisortanngorneranik pilluaqquvaa.
Josephine Nymand, septembarip aallaqqaataani Pinngortitaleriffimmi pisortanngussaaq.
Klaus Nygaard Pinngortitaleriffimmi ukiuni 30ni pisortaareerluni nammineerluni kissaatigisaminik tunuartussanngorpoq.

Josephine Nymand Pinngortitaleriffimmi pisortaaninngussasoq Naalakkersuisut aalajangerput. Tamannalu ippassaq ilisimatitsissutigineqarmat ualikkut Pinngortitaleriffimmi malunnartinneqarpoq. Josephine Pinngortitaleriffimmi Avatangiisinut Immikkoortortaqarfimmi pisortatut atorfeqarpoq, 2014-mili tassani atorfeqarsimalluni. Aamma Nunatsinni Ilisimatusarnermut Siunnersuisoqatigiinni siulittaasuuvoq. Josephine Nymandip Kalaallit Nunaanni Ilisimatusarnermut Siunnersuisoqatigiinniinnermini kalaallit ilisimatusarnerannik aallaaviliinissaq ingerlaavartumik sulissutigisimavaa, kiisalu nunani tamalaaniit ilisimatusarnerit Kalaallit Nunaanni ingerlanneqartut kalaallit ilisimatusarnikkut avatangiisaannut inuiaqatigiinnullu iluaqutaanissaat qulakkeerniarlugu sulissutigisimallugu.

Gert Mulvad, Pinngortitaleriffimmi siulersuisuni siulittaasup pisortanngortitaasoq pilluaqqusinermini neriulluarpaloqaaq.

”Nunatsinni Ilisimatusarnermik Siunnersuisoqatigiinni suleqatiginikuugakkit nalunngilara pikkorissuusutit tamaattumik illit Pinngortitaleriffillu sinnerlugu pisortanngortitaanerit nuannaarutigaara”, Gert Mulvad oqarpoq.

Josephine Nymand biologitut ilinniarsimavoq aammalu Københavns Universitet-imiit ph.d.-qarluni. Josephine ukiorpassuarni ilisimatusarnermik suliaqarsimavoq, aqutsinerullu iluani aqutsisutut ilinniagaqarsimalluni.

“Josephine Nymand atorfinitsissinnaagatsigu nuannaarutigaara. Ilisimatusarnerup silarsuaani Kalaallit Nunaannilu ilisimaneqarluarpoq pikkorissuullunilu. Nukittuumik kiinnertarpoq, ukiorpassuarnilu aqutsisutut misilittagaqarluni, periusissiorfiusumik eqqarsartarluni aammalu angusassanik angusaqarnissamut pikkorissuulluni”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

“Tamatuma saniatigut Klaus Nygaard nammineerluni tunuarniuteqarsomasoq Pinngortitaleriffimmi inuiaqatigiinnilu sulisimaneranut qutsavigerusuppara, ukiut 30-t sinnerlugit atorfimmi atuussimaneranut”, Kalistat Lund oqarpoq.

Josephine Nymand 1. septembari 2023-mi atorfinissaaq.