Hans Mølgaard’imut eqqaaniut Saqqummersinneqarfia 25.02.2025

Hans Mølgaard’ip Sisimiuni piniarnermut nakkutilliisuunerani nalilerneqarsinnaanngitsumillusooq suleqatigilluartarsimaneranut Pinngortitaleriffimmiit qujassutissaqaqaagut. 1990’ikkut aallartinneraniit Hansi asimi alaatsinaalluni tuttunik umimmannillu misissuinerpassuarnut suleqataasarsimaqaaq, taakkualu Hansip ilisimasaqarluarneranik suliaminillu pimoorussilluarsimaneranik aallaaveqartumik piviusunngorsinnaasarsimapput. Hansi uumasut uumariaasiannut, nunap qanoq ittuuneranut, qamuteralallaqqilluni ingerlassisarnerani, anorip, silap aammalumi piniarnerup suuneranik piginnaaneqarluarneri iluaqutaasarsimaqaat. Pinngortitaleriffiup suliaanut Hansip sulinermini sunniuteqartarsimanerisa ilaannik taasaqarusuppugut, Pinngortitaleriffiup ilisimatuussutsikkut saqqummersittagaanni peqataasutut ukununnga ilanngunneqartarsimammat :

Umimmaat ilisimatuussutsikkut misissuiffigalugit suliarineqarneri Kangerlussuarmi 1993imi peqataaffigaa, Kangerlussuarmi umimmanniartoqartalersinnaaneranut tunngaviliisuusoq.
Akiani Nuummi Kangerlussuarmilu 1996, 1997, 2008 aammalu 2009mi ilisimatuussutsikkut misissuilluni sulinermut peqataasimavoq, tassanilu ilisimalikkat tunngavigalugit tuttoqatigiiaat amerliartorsinnaasarneri uumaannarsinnaassusaallu paasisaqarfigineqarput, taamaasillunilu peqassutsit aqunneqarsinnaalersillugit nunanilu tamalaani ilisimatuussutsikkut suleqatigiittoqarsinnaanngortillugu.
1998imi Kapp Atholl’imi umimmaat ilisimatuussutsikkut misissuiffigineqarmata kukiffaat nappaammik innarlerneqarujussuarsimasut misissuiffigineqarmata.
1997-98 aammalu 2008mi snescooterit (qamuteralaat) qulimiguulillu atorlugit tuttut pisareriarlugit uumatillugit satellitsikkut attaveqaatilinnik qungasequtilersorneqarmata. Qungasequtilersuinerup kingunerisaanik piaqqiortarneri, ukiullu nikerarnerani angalaartarneri, sumiiffiillu pingaaruteqarluinnartut il.il. paasisaqarfigineqarluarput.
2000imiilli ukiut tamakkingajallugit ukiuunerani ikinnerpaaffiliiniarluni umimmannik Kangerlussuarmi kisitsinernut peqataasarsimavoq. Ilisimalikkat tassani umimmaqassutsip aqunneqarnissaannut tunngaviliisuusimallutik.
2001imi ukiuunerani piniarnerup nalaani Kangerlussuarmi umimmaat misissugassanik katersuiffigineqarput ilinniartup inaarutissamini suliaanut atugassanik. Hansi ikiuussimanngitsuugaluarpat suliniut taanna iluatsinneqarsinnaasimanavianngikkaluarpoq.
Ukiut ingerlanerini tuttut DNAvinik misissugassanik katersisoqarsimavoq, nunani tamalaani suleqateqarnermut atugassanik.
Tuttunik umimmannillu kisitsinerparpassuit 2000imiit 2024imut peqataaffigisarsimavai. Paasissutissat pissarsiarineqartartut peqassutsimik aqutsiniarnermi pingaaruteqarsimaqaat.

Hans Mølgaard’ip uumasut uumanerinut, pinngortitamut ilisimatuussutsikkullu suleqatigiinnermut pimoorussilluinnartarnera assorsuaq naleqarteqalugu qujamasuutigisarsimavarput. Hansi ukiorpassuarni sanitsinni suleqatigisuarsimagatsigu assut qujamasuutigingaarlugu usorsisimaarutigaarput. Hansip ilaqutai ikinngutaalu misiginneqatigalugit eqqarsaatitsigut najorpagut.