Imartatsinni aatsitassarsiorneq – sunniutigisinnaasaanut periusissiaqarluni naliliineq Saqqummersinneqarfia 20.11.2025

Karl Zinglersen, Pinngortitaleriffimmi Avatangiisinut Aatsitassarsiornermullu Immikkoortortaqarfimmi pisortaq imaani aatsitassarsiortoqassatillugu sunniutigisinnaasai pillugit Katuami Greenland Science Week’eqarnerani saqqummiussaqarpoq – ullumikkulli piiaasoqarsinnaaneranut akuersissutinik peqartoqanngilaq.

Pinngortitaleriffik Aarhus Universitet’ilu nunatta kitaata avataani itissutsinik assigiinngitsunik nalunaarsuillutik suliaqarsimapput, taakkualu inerneri innersuussutaasullu Karl Zinglersenip saqqummiussiffigai.

Tassumalu nassuiaatigaa sumiarsuit sorliit periutsillu sorliit immap naqqani aatsitassanik qalluinissanut atorneqarsinnaanersut, ilaatigut qalutaassuarnik atuisoqarsinnaagami imaluunniit imaani ikkannerusumi milluaatinik milluaasoqarsinnaassalluni, immamili itinerusumi maskiinat robotiusut atorlugit immap naqqani itisuumiittumi qalluisoqarsinnaasussaavoq.

Inuit ingerlataattut allatulli imaani aatsitassarsiortoqassappat pinngortitamut avatangiisinullu sunniuteqartussaavoq, soorluttaaq uumasoqatigiiaat imaani ataqatigiinnerinut nerisareqatigiiaanullu sunniuteqarsinnaasussaavoq.

Assersuutigalugu aatsitassarsiornerup immap naqqa annerusumik minnerusumilluunniit aserortersinnaavaa imaanilu pujoralannik qaleriiaatsitsisinnaalluni aatsitassanik arrortikkuminaatsunik akoqartunik. Umiarsuittaaq arlallit assigiinngitsunik atortoqartut nipiliortitsillutillu qaamanermik pilersitsisartussaassapput. Ingerlatat tamakkua assigiinngitsut uumasut assigiinngitsutigut sunniuteqarfigisussaavaat, imaani allatigut suliaqartoqartarneratulli. Taamaattumik sunniutit tamakkua annikinnerpaaffianiinnissaat pingaaruteqaqaaq.

Karl Zinglersen’ittaaq nassuiaatigaa sumiiffiit assigiinngitsut issittup uumasuinik najorneqartartut sumiittarnersut, tamakkualu sumiiffittut malussajasutut nalunaarutigineqarnissaat pingaaruteqarluinnarnerarpaa. Ingerlatanik suunilluunniit sunnerneqannginnerpaallutik uumaannarsinnaaniassammata.  Ullumikkummi sumiffinni aalajangersimasuni kilisattoqarnissaaaluunniit inerteqqutaareerpoq, sumiiffiillu nalunaarsorneqarsimareerput tamaani uumasut sunnertiasinnaasut akornguserneqannginniassammata.

Nunatsinni pinngortitaq avatangiiserlu pillugit Pinngortitaleriffik nalunaarsuuterpassuarnik ilisimasanillu peqarluareerpoq, kisiannili suliniutit annertuut soorlu immap naqqani aatsitassanik piiaasoqalernissaanut tunngasunik aallartittoqassagaluarpat taava misissuinerit paasissutissallu amerlanerit pissarsiariniarneqartariaqassapput.