Issittumik arferit peqqissusaat suliniummi nutaami misissuiffigineqalersoq Saqqummersinneqarfia 16.04.2025
Arfiviit Pinngortitaleriffimmi suliniummi nutaami misissuiffiginiarneqalerput arferit annerit minnerillumi imartatta nakorsaatinik mingutsinneqarneranik qanoq sunnerneqarsimatiginersut. Suliniummi aningaasaateqarfimmit Velux’imit aningaasaliiffigineqartumi aqutsisuussaaq ilisimatooq (professor) David Møbjerg Kristensen, Roskildep Universitetianeersoq. Kattuffiit arlallit aamma suliniummut akuliunneqarsimapput.
Issittumi arferit annerit minnerillu qanoq nakorsaatit sinnerinik mingutsinneqarsimatiginersut suliniummi paasiniassallugu anguniagaavoq, arferillu peqqissusaannut mingutsinneqarnerat qanoq sunniuteqarnersoq aamma paasiniarneqassaaq. Suleqatigiit teknikkikkut periutsit assigiinngitsut atorlugit misissuiffigisussaavaat i) nakorsaatikut sinnerinik allanillu akuutissanik timaasa mingutsinneqarsimanerat, ii) uisarusertitaanersut aammalu kinguaassiorsinnaassusaat uuttortarneqassaaq, iii) nerisaat avatangiisaallu pinngortitaq misissoqqissaarneqassapput aammalu iv) DNA-teknikkit atorneqarlutik.
Miluumasunit misissugassanit katersorneqareersimasut Pinngortitaleriffimmiittut atorneqassapput, ukiuni arlalinni Maniitsup eqqaani niisanit tigusiffiginninerit aammalu kitaani qilalukkanit qernertanit misissugassatut ukiuni 40ni kingullerni katersorneqarsimasut atorneqartussaapput. Ilisimatusartut aamma misissugassanik nutaanik katersisussaapput sumiiffinni piniartut peqatigalugit Maniitsup eqqaani niisaneersunik aammalu qilalukkanik qernertanik sumiiffinni arlalinneersunik misissugassaminnik katersisussaagamik.
Pinngortitaleriffik misissugassanik arferneersunik katersisuusussaavoq, aammalu piffissap ingerlanerani arferit nerisaannik avatangiisaannillu misissuisussaalluni. Taamaasilluni nerisaasa avatangiisaasalu misissuiffigineqarnerisiguttaaq nalilerneqarsinnaassagami nakorsaatikut mingutsitsinerinik nerisaat aammalumi timaat qanoq atsigisunik mingutsinneqarsimatiginersut. Taakkua saniatigut Pinngortitaleriffiup DNAmik misissuineq ilannguttussaavaa, taamaasillunilu arferit/aarluaarsuit utoqqaassusaasa missingersuusiornissaannut nutaanik periusissanik piorsaaqataasinnaassalluni, peqqissusaallu naliliiffigisinnaassallugu aammalu nakorsaatikut akuutissallu allat sinnerinik imaq qanoq sunnerneqarsimatiginersoq naliliiffigineqarsinnaalissaaq. Pinngortitaleriffik aamma peqataarusuppoq nunatsinni niisat qilalukkallu qernertat kinguaassiorsinnaassusaannik naliliisalersinnaanissaminut.
Pisissiusanik sakkortuunik atortoqarluni arferit uumasut mattaannik orsuannillu tigusiffiginnilluni periuseq atorlugu katersukkat atorsinnaassallugit suleqatigiit tamarmik neriuutigaat, taamatuttaat pisarineqarsimasunit pissarsisarnermikkut misissuisarusullutik, taamaasiornikkut issittup arferisa peqqissusaat ungasinnerusumut isigaluni nakkutigineqarsinnaanngussammata.
Sukumiinerusumik paasisaqarniaraanni attavigisassaq:
Miluumasunut Timmissanullu Immikkoortortaqarfimmi ilisimatusartuuneq Marie Louis Email: marie.louis@natur.gl
