Kitsissunnguani timmissat ikiliartortut Saqqummersinneqarfia 06.03.2025
Kitsissunnguit Qeqertarsuup Tunuata kujataatungaaniittut timmissat assigiinngiiaassusaat aallaavigalugu timmiaqarfiit pingaarnersaraat, uumasoqatigiiaallu assigiinngiiaassusaat aallaavigissagaanni pingaaruteqartuuvoq. Qeqertanili timmiaqatigiiaat ikiliartorput, ilaatigut terianniaqarnera peqqutaalluni, tamanna Pinngortitaleriffiup nalunaarusiaani erserpoq.
Kitsissunnguit imeqqutaalaqarluartutut ilisimaneqarput nunarsuarmilu imeqqutaalaqarnerpaasimagaluarlutik. Timmissat allat soorlu appaliarsuit qilanngallu nunatta kitaani ikittunnguusaraluartut aamma qeqertani piaqqiortarput. Naluumasortut aamma amerlasuujullutik tassaniittarput, Kitsissunnguillu aamma timmissanik qaqutigoornerusunik soorlu kajuaqqanik naajannguanillu najorneqartarput. Kitsissunnguani timmissat nalunaarsorneqarsimasut 52’put – taakkunannga 27it manniliortartuullutik – taamaasillutillu qeqertat 8 kvadrat-kilometeriunngitsunilluunniit annertussuseqartut piujuartinneqartariaqarlutik.
Ikiliariarujussuarneq
Timmissat Kitsissunnguaniittut ukiuni qulikkaani kingullerni ikiliartorujussuarsimapput. Imeqqutaallat ukiut 20it matuma siornanut sanilliullutik pingajorarterutaannanngorsimapput. Timmissat allat aamma ikileriaateqarsimapput siunissamilu qaninnermi nungussinnaallutik.
Nalunaarusiami inaarutaasumik nalilerneqarpoq ikiliartornerinut terianniat peqqutaasut. Ukiunimi kingullerni 20ni terianniat amerleriarujussuarsimagamik, siaruaassimallutillu, ullumikkut qeqertani tamani terianniaqalersimalluni allaat. Peqqutit allat tassaapput unioqqutitsilluni mannissartarnerit aammalu timmissat nerisaannik allanngortoqarsimanera ikileriarnerannut patsisaaqataasinnaavoq, Kitsissunnguani timmiaqarnera ataatsimut isigalugu ajorluinnarpoq.
Innersuussutit tigussaasut
Teknisk rapport nr. 133, ”Kitsissunnguit – killiffissiorneranni” Kitsissunnguani ilisimasariaqakkat katersorneqarput qeqertanilu timmiaqarnerata allannguuteqarnera nassuiaatigineqarluni terianniaqarneralu taakkartorneqarluni. Timmiakilligaluttuinnarnera unitsinneqassappat nalunaarusiami qanoq iliortoqarsinnaanera innersuussutigineqarpoq.
Innersuussutit pingaarnersaralugulu piaarnerpaamik pilersinneqartariaqartoq tassaavoq qeqertami nakkutilliisoqartalernissaa, aasap qaammataani qeqertaniissinnaasumik, taamaasillunilu terianniat ikilisarsinnaassallugit. Aammattaaq innersuussutigineqarpoq Kitsissunnguani timmissat uumasullu aalaakkaasumik kisinneqartarnissaat, taamaasilluni allannguutaasut qanimut malinnaaffigineqarsinnaaniassammata. Kiisalu Kitsissunnguani pinngortitami naleqaqisutut uumasut innuttaasunut atuartunullu ilinniusiornikkut paasissutissiisoqarnissaa innersuussutigineqarpoq.
