Kunngi aqissillu isigaa Saqqummersinneqarfia 01.05.2025

Pinnaluk Olsen gav gaven til kongen. Pinnaluk Olsenip kunngi tunissuteqarfigaa
Bilo Chemnitz ilinniartut sinnerlugit saqqummiisut aapparaat
Aqutsisoq Aviaja Lyberth Hauptmann biologinngorniarneq Sila pillugu saqqummiisoq
Tusarnaarluartoqarpoq
Halumi Daorana Qaanaameersoq Kunngimit immikkut maluginiarneqarluarpoq, ataqqinartorsuup Qaanaamiikkami angajoqqaavi ilisarisimalersimagamigit
Kunngi Halumip angajoqqaavi pillugit oqaluttuartoq
Linda Bagger aqqanilinnik ukioqarlunili qimussernermut imminut ilinniartissimalluni oqaluttuarpoq.
Qimmit qimmeqarnerlu Kunngi Frederiup soqutigisaanut ilaalluinnartuupput.
Biologinngorniat ataqqinartorsuarlu Kungi Frederik qulingat.

 

Silami Biologinngorniartut Kunngimut tunissutissaminnik namminneq sanasimapput: aqissip isigaa kiisalu aqissip puijainik snapsiliaq tunissutigigamikku

 

Silami Biologinngorniartut Kunngimut tunissutissaminnik namminneq sanasimapput: aqissip isigaa kiisalu aqissip puijainik snapsiliaq tunissutigigamikku
 
 
Kunngi Frederik qulingata biologinngorniarfik Sila pingasunngormat ullaavani pulaarmagu aqutsisup Aviaja Lyberth Hauptmann’ip ilinniarfik Sila Nuummiittoq uummaarissumik nassuiaateqarfigaa. Ilinniarneq nunani allani biologinngorniarfinniit allaaneruvoq nunatsinni uumasut nunalu najornerullugu atornerullugillu ilinniartaramik, nunani allani inini kemi’mik misissuiffiusartuni piffissarujussuaq atorneqartartoq.
 
Gertrud Lyberth, ilisimatusarfimmi allami biologinngorniaqqaarsimavoq oqaluttuaraalu nunatsinni ilinniarnerup nunani allani ilinniarnermiit suna assigiinngissutigineraa, Bilo Chemnitz’ip nassuiaatigaa nunatsinni biologinngorniarneq pinngortitamiinnerujussuulluni ilinniarfiusuusoq imminut tulluunnerujussuusoq.
 
Ilinniartut imminnut ilisaritimmata Kunngip soqutiginninnera suli itertinneqarporlusooq Halumi Daorana Qaanaamiit ilisaritimmat, tassanimi Kunngip angajoqqaavi paneeraallu eqqartuleramigit, paasinarsivoq Halumi’p angajuata meeraanerani angajoqqaavi ilisarisimasimagai.
 
-Arraa, tassa ukiut 25it qaangiutereerput, Kunngi oqarpoq.
 
Ilinniartoq Linda Bagger, 11nik ukioqarlunili qimussernermut imminut ilinniartissimalluni oqaluttuarmat qimmaqartarnera pillugu aamma apersorluarneqarpoq.
 
Taava kalaallit qimmiat nunarsuarmi qimminit tamanit sivisunerusumik piusimanera eqqartorneqarmat, ilinniartut namminneq aamma ilalisaatinik misissuisimanerminnik eqqartuipput, oqallinnerlu uummaarinnerulerluni, kunngilu ingerlaqqinnissaminut ulapippasinngimmat aqisserniarnerit tuttunniarnerillu aamma eqqartorneqarput.
 
-Ilinnut tunissutissatsinnik aamma nammineq sanagatta, Pinnaluk Olsen nikuilluni Kunngi tunissuteqarfigiutaa oqarpoq. Nassuiaatigalugulu aqissip isigaa tunissutissaliarisimallunikku.
 
Tunissutigineqartoq ammarneqarmat, Bilo Chemnitz nikuilluni aamma Kunngimut tunniussiartorpoq, tassami aqissip puiaanik imigassaliorsimasaminik Kunngi tunigamiuk. Inimi illallattaartoqarpoq silaannarlu oqingaarami suloqarpalullunilusooq.
 
Ilinniartut Kunngi Frederik assiliseqatigerusullugu kissaateqarmata akuersaarluarneqarput.
 
Silamilu anoraa sukakkaluttuinnarami ullumikkut Nuummiit aallartoqarnavianngitsutut isikkoqarpoq.