NAFO’p Pinngortitaleriffiullu nunatta Kitaata avataani qaleralittassiissutissanut, suluppaagartassiissutissanut qeerartassiissutussanullu innersuussutaat sinerissallu qanittuani qaleralittassiissutissatut siunnersuineri Saqqummersinneqarfia 01.07.2025
Nunatta kitaata avataani qalerallit nunatta Canadallu avittaramikkut, taamaattumik nunanut taakkununnga siunnersuineq ataasiusarpoq.
Qaleraleqassuseq oqimaassusinngortikkaanni peqassuseq peqqissutut taaneqarsinnaavoq, qaleralinniartoqartarneralu piujuartitsiniartumik taaneqarsinnaanissaminut qanittunnguamiippoq. NAFO’p ukioq manna pisassiissutissat aalajangersimasumik kisitsisiliinngilaq, pisassiissutaasinnaasunilli arlalinnik periarfissaasinnaasunik taasaqarluni, NAFO’p kisitsisiliussai peqassuseq peqqissumiikkaangat mianerinnissutigisassatut taasakkap iluaniittuupput. Siunnersuineq taanna periarfissiivoq, aqutsisut namminneerlutik peqassutsip oqimaassusinngortinnerani suup tungaanut ineriartortikkusunnernera aallaavigalugu akuerineqarsinnaasumiitinnissaata namminneq inississinnaasussaassavaat. Pisassissutaasinnaasut 30.000 tonsit 36.000 tonsillu akornganniipput sunniutaasalu kingunerisinnaasaasa sumiitikkusunneruneri apeqqutaallutik inissiisoqarsinnaasussaavoq. 2024imi pisat katillugit 33.900 tonsiupput, taakkunannga 16.500 tonsit nunatta imartaani pisarineqarsimallutik taavalu 16.500 tonsit Canadap imartaani pisarineqarsimallutik. 2025imi pisat taamatut inissisimanissaat naatsorsuutigineqarpoq.
Qeqertarsuup Tunuani, Uummannami, Upernavimmilu qaleralittassat pillugit sinerissap qanittuani siunnersuinerit ukiut marlukkaarlugit innersuussutaasarput. 2024imi siunnersuisoqarpoq ukiunut 2025 aamma 2026imut atuuttussaasumik. 2024imilu aalisarneqarsimasut Pinngortitaleriffiullumi misissuineraneersut aallaavigalugit, NAFO’p 2025imut siunnersuinera nalimmassaaffigineqarsimavoq. NAFO’p ilisimatuussutsikkut siunnersuisoqatigiivi isumaqarput 2024imi misissukkat ersersikkaat qaleraleqassuseq nikissimanngitsoq, taamaattumillu siunnersuineq taamaaginnassasoq. Peqassuserli oqimaassusinngortikkaanni appariaateqartoqartoq Pinngortitaleriffiup maluginiarpaa, taamatuttaarlu angissutsit assigiinngissitaarneri amusinermilu ataatsimi pisat annertussusaat aalisartut pisarisaanni 2023imiit 2024imut appariaateqarsimallutik. Pinngortitaleriffiup tamanna naliliiffigigalugu isumaqarpoq, qaleraleqassuseq kingullermik 2024imi siunnersuinermut sanilliukkaanni appariaateqarsimasoq masakkullu appasissumiittoq.
Kitaata avataani suluppaakkat pillugit siunnersuineq ukiut marlukkaarlugit pisarpoq, ukiunullu 2025-2026 atuuttussaalluni. Suluppaakkallu toqqaannartumik pisariniarneqartassanngitsut, ingerlaqqittumik siunnersuissutaaginnarpoq.
Qeqqat marluusut tassalu nimeeq aammalu qeeraq/kigutilik avataani ukiuni 2024-2026 attuuttussamik siunnersuisoqarpoq. Nimeeq 775 tonsit qaangerlugit pisaqarfigineqaqqusaassanngilaq qeqqallu titarnillit toqqaannartumik aalisarneqaqqusaanngikkallarput, sapinngisamillu pisarisoorneqaqqusaanatik.
Siunnersuineq tamakkerlugu uani atuarsinnaavat
Sukumiinerusumik paasisaqarniaraanni attavigisassaq:
Aalisakkanut Qalerualinnullu Immikkoortortaqarfimmi pisortaq Helle Siegstad: oqarasuaat +299 361200, imaluunniit mail hesi@natur.gl paasiniaaffigineqarsinnaapput.