Pinngortitaleriffik Asimi Science Camp’imi peqataavoq: Saqqummersinneqarfia 16.07.2025

oplus_2

Inuusuttut Danmarkimiit nunatsinniillu ilisimatusarnermik misiliisinneqarput

Allattoq: Sascha Schiøtt

Nunatsinni Danmarkimilu ilinniarnertuunngorniartut 12it pinngortitami ilisimatusarluni ulluni 1.–10. juuli aaqqissuussiffigineqarmata Pinngortitaleriffik peqataavoq.  Nunatta pinngortitaani asseqanngilluinnartumi ilisimatusavinneq tassani misilittarneqarmat misigisassat pissanganartut Pikialaarfimmi, asimi ilisimatusarlunilu alapernaasernerit ingerlanneqarput.

Ullormi siullermimiit ilinniartut Pinngortitaleriffiup ilinniartitaanermut illuutaani Pikialaarfimmi tikilluaqquneqareeramik Asiaq’mit, GEUS’imit aammalu Ilisimatusarfimmi biologinngorniarfimmit oqalugiarfigineqarput. Ullormi tassanittaaq qaqqamut pisuttuartoqarnerani ilinniartut qaarsut ilusilersorsimanerinik, ujaqqat suunerinik, issittullu naasuinik paasissutissiiffigineqarput.

Ullup tulliani Kangerluarsunnguanukartoqarpoq tassani Pinngortitaleriffiup ilisimatusarfia takuniarlugu. Alaatsinaanneqartutut ingerlanneqartut sorpiaanersut nassuiaassiffigineqarput. Asimilu nammineerlutik naasunik, sullinernik uumasuaqqanilu misissuinissaminnut periarfissinneqarputtaaq – tatsimilu tatsip uumasuarai ”dafnier” aamma katersorlugillu misissuiffigaat.

Ullut sinnerisa sisorartarfimmi Kang Skicenterimi ingerlanneqarnerini ilinniartut eqimattanut pingasunut agguaanneqarput, tamarmik immikkut ilisimatusarfigisassaqarlutik. Eqimattat ataatsit sermeqarfiit aanneri, aannerisa kinnganeri ilusilersorsimasaalu suliaqarfigaat. Allat kuuk misissuiffigaat, silallu allanngornera malillugu qanoq supitiginera uuttortartarlugu. Eqimattat pingajuata uumasoqatigiiaat assigiinngissitaarnerat sammivaat naasut sullinerillu qatsissutsini assigiinngitsuni misissugaralugit.

Peqataasut ilisimatusariaatsinik pinngortamilu ilisimatusarnernik suliaqaannanngillat –  qanimulli aamma misigivissorpaat pinngortitap nukiisa qanoq ittuuneri, ulluni marlunni anorersualerami silamilu suliassaat ulluni marlunni sunnerneqavissorlutik.

Asimi Science Camp ilikkagaqarfiginarlunilu puijunaatsuuvoq, inuusuttut piffissap sivikitsup iluani ilisimatusarnermik misilittaatitaagamik – imaassinnaavorlumi siunissami ilisimatusarnerup silarsuaani suliaqarsinnaalernissaminnut isumassarsititaalluartut.