Pinngortitaleriffimmi immikkoortortani pisortartaat marluk Saqqummersinneqarfia 07.11.2025

Pinngortitaleriffik novembarip aallaqqaataani immikkoortortani marlunni pisortanik atorfinitsivoq. Søren Lorenzen Post Aalisakkanut Qalerualinnullu Immikkoortortaqarfimmi pisortanngortoq, Malene Simon Hegelund Silap Pissusianut Ilisimatusarfimmi pisortanngortoq.

Immikkoortortaqarfinni pisortanngortut marlulluullutik Pinngortitaleriffimmi ilisimatusartuunertut atorfeqaraluarput, ilisimatusarnermilu ingerlatsivigisaminni ukiuni arlalinni misilittagaqarluarsimallutik.

-Aalisarnermut Qalerualinnullu Immikkoortortaqarfiup ingerlateqqinnissaanut ineriartorteqqinnissaanullu qilanaaqaanga. Kalaallimmi Nunaanni aalisarneq isertitsissutaanerpaajusarmat, qaffasissumik pitsaassuseqartumik siunnersuisarnissarput pingaaruteqaqaaq taamaasilluta imartatsinni pisuussutigut piujuartitsiniartumik atorluarsinnaaniassagatsigit. Aammali Helle Siegstadip ukiorpassuarni suliarisimasai ilisimalersimasatsinnut ullumikkullu ingerlaatsitsinnut pingaaruteqaqisut pillugit nersualaarusoqaara, Søren Post oqarpoq.

Allannguutit pipput Helle Siegstadip Aalisakkanut Qalerualinnullu Immikkoortortaqarfimmi pisortaanerminit tunuarniuteqarluni kinguaariinnut tulliuttunut atorfini tunniukkusulermagu. Helle’li suliinnarallassaaq siunnersortaanertut ilisimatuussutsikkullu umiarsuatsinnut akisussaasuunini ingerlatiinnartussaassavaa.

Tunuartup aappaa Mie Hylstofte Sichlau Winding, Silap Pissusianut Ilisimatusarfimmi pisortaajunnaarniarsiamvoq sulinini DTUmi ingerlateqqinniaramiuk.

“Silap Pissusianut Ilisimatusarfimmi pisortanngornissara qilanaareqaara. Ilisimatusarfitsinni assigiinngitsunik suleqateqarluta silap pissusiata allanngoriartorneranut tunngasutigut imaani ilisimatusarnerit imaanilu uumasoqatigiiaat pillugit ilisimatusarnerit minnerunngitsumillu ilisimatusarnitsinni kalaallinut inuiaqatigiinnut iluaqutaanissaanik eqqumaffiginnilluarnissarput pingaarteqigakku. Kalaallit Nunaanni ilisimatusarluni suliaqarnerup pitsanngorsaaffiginissaa qilanaareqaara, nunatsinneersut nunaniluunniit tamalaaneersut suleqatigiillutik nunatsinni ilisimatusarnerup silarsuaata ineriartorteqqinnissaa eqqarsaatigalugu” Malene Simon Hegelund oqarpoq.

Pinngortitaleriffiup Søren Lorenzen Post kiisalu Malene Simon Hegelund kissalaartumik tikilluaqqungaarpai, suleqatigiinnerullu pitsaasumik pissarsiaqarnartumillu ingerlanissaa qilanaaralugu.

Sukumiinerusumik paasisaqarniaraanni attavigisassaq:

Pisortaq Josephine Nymand oqarasuaat 361200 email: jony@natur.gl