Pinnngortitaleriffik AI’mik attaveqalersoq Saqqummersinneqarfia 11.12.2025
Pinngortitaleriffiup nuannaarutigeqalugu nalunaarutigisinnaanngorpaa, qarasaasiatigut silassorissuusialerneqarnitsigut annertuumik suliaqarsinnaaleratta – atortorissaarutit pisortatigoortumik atuutilerneratigut – nunatsinnilu ilisimatuussutsikkut paasissutissanik suliaqarnerup tungaatigut tamanna siuariaaterujussuuvoq.
Siorna maannamiit ukioq ataaseq qaangilaarlugu matuma siornatigut immikkoortortanit tamanit peqataaffigineqartumik eqimattaliorpugut. Pingaarnerpaajutinniarlutigu: Nalunaarsugaatitta, nalunaarsukkattalu ingerlanneqarnerat ataannartumik ingerlanneqarsinnaanngorniarlugu, taamaaliornissamullu qarasaasiat piginnaaneqarnerulersinniarlugit suliarineqartussat isumagisinnaalluarniassagatsigit, silassorissuusiamik AI’mik ingerlatsiviusumik ilisimatusarsinnaaneq pilersikkusukkatsigu. Suliniutigut arlallit – assinik ilisarinnissinnaanissamiit aamma 3D-mik ilusilersukkanik pitsaalluinnartumillu misissueqqissaarsinnaalertussaasimapput – ullumikkulli taamaaliussagaanni qarasaasiat nalinginnaasumik piginnaasaaninngarnik annertunerujussuarmik piginnaaneqalernissaat pisariaqarluinnarsimavoq.
“Carlbergfondemit aningaasaliisoqarneratigut isumassarsiaq pilersaarutinngortissimavarput siunnersuummillu ineriartortitsilersimalluta,” Diana Krawczyk oqaluttuarpoq. Ukioq ilivitsoq pilersaarusioreerluta, pisiniareerluta aammalu atortut ikkussorneqareernerisigut atortut tamakkiisumik atorneqarsinnaanngorput. Illoqarfimmi qarasaasialeriffiup COMBU A/S-ip Pinngortitaleriffimmut atortut ikkussorpai, nunani tamalaani teknologilerisit Dell Inc. Aammalu NVIDIA Ilc. peqatigalugit.
Aningaasaateqarfimmit Carlsbergfondimit aningaasaliissutaasut nunatsinni ilisimatuussutsikkut qarasaasiatigut suliaqassutaasinnaasup piginnaaneqarnerpaasullu ikkussornissaa taamaalilluni piviusunngortinneqarsinnaasimavoq, ukiullu ataatsip ingerlanerni pilersaarusiorneq, pisiniarneq ikkussuinerlu piviusunngorsinnaalersimapput.
“Sullitarput Kalaallit Nunaanni sukkanerpaamik qarasaasiaqalerpoq” Michael Collin COMBY A/Smeersoq oqarpoq, “piviusunngortissinnaaneralu tanngassimaarutigaarput.”
Silassorissuusiaq atorlugu attaveqaateqalernikkut Pinngortitaleriffiup ilisimatuussutsikkut qarasaasiatigut inissaqartitsinera annertusissaqaaq.
“Atortoqalerpugut assissaqanngitsumik sukkassusilimmik piginnaaneqartumillu, silassorissuusiatigut, paasissutissanik suliaqarnissamut aammalu ilusilersuinissatsinnut qarasaasiarlu atorlugu ilisimatuussutsikkut suliassat initoorujussuit ajornaatsumik suliarisinnaanngorlutigit” Aqqaluk Sørensen oqarpoq.
Assersuutigalugu suliassat maskiinat assigiinngitsut ilinniarnissaannut sungiusaataasinnaasut, asimi paasissutissarpassuit katersorneqartut suliarinissaannut, kiisalu pisuusaartitsinerit ingerlanneqarnissaannut, aammalu avatangiisit 3D’ngorlugit suliarisinnaanissaat pisarnitsinnit sukkanerujussuarmik suliarisinnaanngorpagut.
Ukiummi tamakkiallugit ilisimatusartutta paasissutissarpassuit katersortarpaat – arlalitsigut avatangiisitsinni matutta silatinnguaniittuneersuusinnaasut.
“Paasissutissarpassuit tamakkua sukkasuumik ilisimasanngortinnissaallu inuiaqatigiinni ilisimatusarnermilu atorneqarsinnaasunngortinniarlugit suliarinissai pisariusarsimaqaat” Karl Zinglersen oqarpoq.
Atortugut nutaat atorlugit sukkanerusumik torraanerusumik taavalu takuneqanngisaannartumik pitsaassuseqartumik suliarisinnaalissavagut.
Taamatut pisinnaasaqartigisumik qarasaasiaqalernitsigut, issittumi ilisimatusarnikkut inissisimanerput assut nukittortipparput, nunarpullu issittumi avatangiisinut tunngatillugu ilisimatusarnertigut siunissamittaaq qitiulluarsinnaanngortinneqarpoq.
Sukumiinerusumik paasisaqarusunnermi attavissaq:
Avatangiisinut Aatsitassanullu immikkoortortaqarfimmi pisortaq Karl Zinglersen oqarasuaat 361200 email: kazi@natur.gl