Qeqertarsuup Tunuani Kitsissunnguani annertusisamik suliniut Saqqummersinneqarfia 28.05.2025

Kitsissunnguit tassaapput Kalaallit Nunaanni – aamma nunarsuarmi – imeqqutaallat ineqarfiisa annerpaartaasa ilaat. Qeqertani imeqqutaalaqatigiit amerlassusaat ukiuni qulikkaani kingullerni kinguariangaatsiarsimapput.
Kitsissunnguit tassaapput Kalaallit Nunaanni – aamma nunarsuarmi – imeqqutaallat ineqarfiisa annerpaartaasa ilaat. Qeqertani imeqqutaalaqatigiit amerlassusaat ukiuni qulikkaani kingullerni kinguariangaatsiarsimapput. Assiliisoq Carsten Egevang
Kitsissunnguani teriannissat ukiuni kingullerni qulikkaani marlunni amerleriangaatsiarsimapput. Amerleriaateqarnerat timmissat qeqertani najugaqarnerannut pitsaanngitsumik kinguneqarpoq. Timmissat assigiinngitsut, soorlu imeqqutaalaq, nunap qaavani ulluliortarput, taamaalillutillu sumiiffimmi tassani piaqqiortarfimmiinnerat teriannissanut qaninnerulersitsisarpoq.
Kitsissunnguani timmissat qaqutigoortut arlallit, kajoquseq uani takuneqarsinnaavoq, kiisortunit illersorniarlutik imeqqutaalarpassuit piaqqiortut akornanniittarput. Imeqqutaallat ikiliartuinnarnerat ilutigalugu timmissat imeqqutaallanik isumalluutillit aamma ikilisimapput.
Kitsissunnguit tassaapput Kalaallit Nunaanni timmissat ineqarfiisa ilaat, uumassusillit assigiinngisitaarneranni immikkuullarissoq pingaarnerpaallu ilaattut inissisimasoq. Qeqertani avallerni, Saattuarsunni, appaliarsuit ikittunnguit piaqqiortarput, taakku Kalaallit Nunaata Kitaani ikittunnguullutik takkusimaartarput.

Aningaasaateqarfimmit aningaasaliisoqarneratigut suliniut nutaaq susassaqarfiit assigiinngitsut akimorlugit aallartinneqarpoq, taannalu qeqertani Kitsissunnguani – Kalaallit Nunaanni timmissat ineqarfiisa pingaarnerpaat ilaanni pinngortitap pisuussutaanik aqutsinerup nukittorsarnissaanut paasissutissiinissamullu tapertaassaaq. Suliniut pingasunik immikkoortortalik Kalaallit Nunaanni Aalisarnermut Piniarnermullu Nakkutilliisoqarfiup (GFJK), Ilinniartitaanermut Aqutsisoqarfiup, Kivitsisap aamma Pinngortitaleriffiup suleqatigiinnerminni pilersitaraat.

 

Nakkutilliineq, ilisimasat paasissutissiinerlu
Suliniummi immikkoortut pingasut qanimut suleqatigiipput aamma tamarmik immikkut sammisaqarput:

  • Piareersaatitut sammisap nakkutilliinertallip aasap qaammataani annertusisamik qeqertaniittoqartuaannarnissaa qulakkiissavaa. GFJK-minngaanniit nakkutilliisoq tassani ilaatigut teriannissat amerliartuinnartut killilersimaarnissaanik suliaqassaaq, teriannissat amerliartuinnarnerat timmissanut ivasunut malunnaatilimmik akornutaasoq paasineqarsimavoq. Nakkutilliinermi qeqertaliartartut eqqakkanillu suliaqartarneq pillugu paasissutissanik amerlanerusunik pissarsinissamut aamma ilapittuutaassaaq.
  • Ingerlaavartumik malinnaaffiginninnermik pilersaarut Pinngortitaleriffiup ingerlatissavaa, Kitsissunnguani timmissat piaqqiortut kisinneqarnerisigut, tassani imeqqutaallat tamaani pingaarutilittut inissisimasut ilanngullugit. Taamatuttaaq uumassusilinnut tunngasunik kisitsisitigut paasissutissat katersorneqassapput, taakku timmiaqatigiit piffissap ingerlanerani ineriartornerat pillugu suliamut tunngavissiisussamik pilersitsinissami atorneqartussaapput.
  • Paasissutissiineq ilinniartitsinerlu suliniummi sukarsuit pingajoraat, tassani Ilinniartitaanermut Aqutsisoqarfik aamma Kivitsisa Pinngortitaleriffik suleqatigalugu meeqqat atuarfianni akullernut atuartunut ilinniartitsinermut atortunik ineriartortitsissagamik. Atortut Kitsissunnguani pinngortitami pissutsinut tunngasunik toqqaannartumik aallaaveqassapput aamma atuartut Kalaallit Nunaanni uumassusillit assigiinngisitaarnerat, silap pissusaa kiisalu inuiaqatigiinni pissutsit pillugit ilisimasaannik annertusaassapput. Pinngortitaleriffiup paasissutissiinermut periarfissarititai atorlugit siammasissumik paasissutissiinissamut atugassat imarisassaanik aamma suliaqartoqassaaq – videot, nipit immiussat podcastillu ilanngullugit.

 

Ataatsimoorluni kivitsineq
Suliniut Pinngortitaleriffiup ataani inissisimavoq, allaffissornikkut qullersaqarfik aquppaa, ingerlaavartumik malinnaaffiginninnermik pilersaarutip ineriartortinneqarnerata saniatigut. GFJK-p sumiiffimmi ilisimasaminik nakkutilliinermillu aaqqissuussinermik tapertaavoq, Ilinniartitaanermut Aqutsisoqarfiullu aamma Kvitsisap ilinniartitsinermut atortut meeqqat atuarfiisa sulinerannut tunngasinneqarnissaat qulakkiigassaraat. Suliniummi sammisat Kitsissunnguit pillugit Aqutsisoqatigiinnit malittarineqarlutillu ataavartumik nalilersorneqartassapput, taakku tassaapput aallartitat Kommune Qeqertalimminngaanneersut, Aalisarnermut, Piniarnermut Nunalerinermut Imminut Pilersornermullu Naalakkersuisoqarfimminngaanneersut, Pinngortitamut Avatangiisinullu Naalakkersuisoqarfimminngaanneersut, GFJK-minngaanneersut aamma Pinngortitaleriffimminngaanneersut.

Suleqatigiilluni suliniut una atorlugu Kitsissunnguani pinngortitap immikkuullarissup piujuartinneqarlunilu paasissutissiissutiginissaanut tamakkiisumik isigisumik siunissarlu ungasinnerusoq eqqarsaatigalugu suliniuteqarnikkut pingaarutilimmik alloriartoqarpoq.

Kitsissunnguani timmissat ikiliartornerat pillugu uani atuarit, tamatuma nalaa pillugu teknikkikkut nalunaarusiap atuarnisssaanut tassanngaanniit ingerlaqqissinnaavutit.