Tarajoq misissuileqqileqaaq Saqqummersinneqarfia 06.06.2025

Aasianniit Qeqertarsuup Tunua Vaigatsilu aqqusaarlugit 72°30’N tikinneqassaaq
Angalanerit sisamaanni Nuummiit Nunap Isuata tungaanut raajanik saarullinnillu misissuisoqassaaq

 

Tarajoq ukioq manna misissuileqqinniarluni sineriatsinnut avalaqqaaqqammerpoq, tamaasilluni aasaq manna alaatsinaalluni misissuinerit kitaani aallartiinnaqaat.

Raajanik saarullinnillu ukiumoortumik misissuinissat avataani ingerlanneqassapput ulluni 1. juuyni – 18 juuli tikillugu.  Nunatta Isuaniit avannamut 72°30’N angullugu Qeqertarsuulluni Tunua ilanngullugu angalasussaavoq.  Misissuinerit sumiiffinnut pingasunut avinneqarnikuupput, angalanermilu siullermi Nuummiit Aasiaat tungaannut angalasoqartussaavoq.

–  Kilisalluta qanoq raajaqartiginersoq aaliagaqartiginersorlu misissortussaavarput, multibeamilu atortussaallutigu, tassa ekkolodilersugaasoq, taamasillutalu immap naqqa 3Dmik assitigut isiginnaarsinnaalertaratsigu. Aamma sineriak ingerlaarfigisarput CTDmik uuttortartussaavarput immap ikerata nillissusaa tarajoqassusaalu paasiniarlutigu, piffissaqassagaangattalu saarulliit aamma nalunaaqutsertassallutigit, sumunnartarnersut paasilluarniassagatsigu, AnnDorte Burmeister, Aalisakkanut Qalerualinnullu Immikkoortortaqarfimmi pisortaagallartoq nassuiaavoq.

Misissuiffitsinni kilisattoqassagaluarpat taava attavigisarumaarpagut sumiinnerput nalunaarutiginiarlugu, imaluunniit sumiiffitsinniit allamut nikissinnaaniassagatta kilisattunut ajoqutaajumanata.

Angalanerup immikkoortortaata tullia Aasianniit Qeqertarsuup Tunuatigut Vaigat aqqusaarlugu 72°30’N angullugu misissuisussaavugut, Canadap imartaanut pilaassalluta, taanna pisussaavoq ulluni 14. – 6. juuli 2025, piareeruttalu Nuummut utertussaassalluta.

Raajanik misissuinerit kingullit ingerlanneqartussaapput Nuummiit  Nunatta Isua tikillugu ullunilu 8.-18. juli 2025 pisussaallutik.