Tarajoq Nalakkersuisumit pulaarneqartoq Saqqummersinneqarfia 28.05.2025

Naalakkersuisoq for Sociale Anliggender, Arbejdsmarked, Indenrigsanliggender og Miljø, Bentiaraq Ottosen, besøger Tarajoq. Photo: Christian Sølbeck / Pinngortitaleriffik

 

Inunnik Isumaginninnermut, Sulisoqarnermut, Nunap iluanut, Avatangiisinullu Naalakkersuisoq Naalakkersuisoq Bentiaraq Ottosen, Atassut, Nuup umiarsualivitoqaanut apuuppoq, tassanilu atorfilittaminut Pinngortitaleriffiullu pisortaanut Josephine Nymandimut ilanngulluni.

Nalunaaqutaq ullaakkut 8.30 nalleqqavaa massakkullu nunatta ilisimatuussutsikkut umiarsuaanut Tarajoq-mut ikisinnaanngorput. Ulissimaqigami majuartarfiit sivingaqisut majuarfigalugit umiarsuarmut ikipput.

Umiarsuup naalagaa Rúni Niclassen pulaartunut tikilluaqqusivoq sutortarfimmilu kaffilleraluartoq pulaartut umiarsuarmik kaajallaaqqaarusunnerupput. Tulleriiaarlutillu umiarsuup aquttarfianut majualerlutik. Umiarsuup aquttarfia igalaanik kaajallalluni unguneqarsimasutut ittoq atortorpassuaqarpoq, taakkualu qanoq atorneqarsinnaanersut pillugit umiarsuup naalagaata oqaluttuaraa.

Taava umiarsuup qaarpiaaniittoq allaffik takornariarneqareermat, init laboratoriallu suliffissuaaqqap eqqaaniittut takornariarneqarput. Pisat suliffissuaaraqarfimmi immikkoortiterneqareeraangamik laboratoriani misissoqqissaarneqartarput.

Tassanngaaniit maskinalerisut naalagaata Tordur Nielsenip pulaartut angallatilerpai, maskinaqarfiillu tamaasa aqqusaarlugit oqaluttuaralugit. Taava umiarsuup saneraani kilisaateeraq ilisimatusartartunit europamiunit atorneqaqqammersut takutinneqarput, taakkuami avaleraasartuut manniinik misissuinerminni taakkua atorsimagamikkit.

Uteriartornermi timigissartarfiit, napparsimmaveeraq errorsisarfiillu aamma takutinneqarput.

Nerisarfimmut uteqqinnermi tamulugassanik suliaqartoqarsimavoq, savalimmiormiut savamik panertuliaannik savallu imusat qallersuutaannik ussiisoqarsinnaanngortillugu, kaffimik najorsillattaajutigaluni.

Pulaartoqarnissaq toqqarluagaavoq, Tarajoq massakkut piareerluinnarami ukiuni kingullerrni aaqqitassaarartai tamakkeramik. Tarajoq Pinngortitaleriffiup misissuilluni angalanissaanut piareerpoq piffissallu ilaani Pinngortitaleriffiup atunngikkaangagu attartorneqarsinnaanngorluni piareerpoq.