Ukiuunerani qaqutigoortoq: Nuup Kangerlua sikoqaqisoq Saqqummersinneqarfia 19.02.2025
Nuummiikkaanni ulluni makkunani Nuup Kangerlua sikoqaqisoq takussaavoq. Isiginnaarlugu alutornarluinnaraluaqisoq, taamaattoq umiatsiaararsortunut umiarsuarnullu ajornartorsiortitsiinnarani aammalu siunissami qanoq allanngortoqarnissaanillusooq siulittuineruvoq.
Sermip sikua, kangerlummi annertoorujussuarmik aniasoq Kangersunermeersuuvoq, ingammik saatungaani Narsap Sermianeersuulluni, taqqamanimi sermip imaanut aniaffii pingasuugamik. Sermeqarfiup saavani tiggussimasoqarnera nalinginnaanerusarpoq, taakkualumi kaanngarlutik kangerlummi siaruaattarneri nalunngilarput. Qaqutigoorutigaali ukiumi taamak siusitsigisumi kaanngartoqarnera, taamallu sukkatigisumik kangerlummiit anillannerat aamma qaqutigoortuuvoq.
”Sikup annersaa upernaakkut kaanngaraangami kangerluummiiginnartartoq takukulaneruvarput, sermillu amerlanerpaartaat Nuup Kangerluata paavanut Nuup avataanut pitinnatik aareersimasarput. Taamaattumik Nuummi sermeq takorpiarneq ajorparput” ilisimatusartuuneq John Mortensen, Silap Pissusianik Ilisimatusarfimmi Pinngortitaleriffimmiittumi atorfeqartoq nassuiaavoq. ”Ukiuni kingullerni qulini Narsap Sermiata anianera aamma sukkatsissimarpasippoq, kangerlummi iluliarasaat tigunnerillu siaruaassimasut annertunerulernikuugamik.” John Mortensen nassuiaavoq.
Februaarimi suna tamarmi aallartisarsimavoq, iluliumanerit 60 km2 it Narsap Sermianiit peerummata. Silalu manngullunilu anorersuariarami tigunnerit kaanngarujussuarsimasut maannakkut Nuummi takussaalersimapput.
Narsap Sermia Pinngortitaleriffimmiit ilisimatusarnikkut suliniutitigut arlalitsigut malinnaaffigineqarluartuuvoq. Narsap Sermiata nakkaaffia 2010miit kilometererpassuanik ilummukarsimagami. Sermillu nakkaaffia maannakkut qattunersamiilersimavoq, nalimmassarfigisinnaasamini. Qattunertarli taanna ilummut qaangissaguniuk taava sermeq annertooq 30 km’nik takitisisumi itisoorsuarmilu kaanngartalertussaassaaq, Silap Pissusiata Ilisimatusarfiup misissuisimanera naapertorlugu.
Pinngortitaleriffimmit Silap Pissusianillu Ilisimatusarfimmi Nuup Kangerlua alaatsinaanneqarlunilu ilisimatusarfigineqarsimavoq, aamma sermeqarfiit, kangerluup immallu ataqatigiinneri qanimut misissuiffigineqarsimallutik. Ingammillu sermit kaanngartartut sermersuullu aannerata kuuttarnera uumaneqarnermut sunniuteqartarnera eqqumaffigineqarsimapput maani ilisimatusarnitsinni aammali Greenland Ecosystem Monitoring (GEM) aqqutigalugu.
”Nuup Kangerlua, nunatsinni kangerluit amerlanerit assigalugit sermit nakkaasarnerisa aakkiartornerisa aammalu immap sineriammeersup sunneeqatigiinnerisa aqutaannut tunngasuupput. Taamaattoqarneratalu kingunerisaanik kangerlunni uumaneqarnerujussuaq pilersinneqartarpoq.” Ilisimatusartuuneq Thomas Juul-Pedersen Silap Pissusianik Ilisimatusarfimmeersoq oqarpoq.
Sukumiisumik paasisaqarniaraanni attavigineqarsinnaavoq: Ilisimatusartuuneq Thomas Juul-Pedersen. Oqarasuaat 361200. Email: thpe@natur.gl