Pinngortitaleriffiup umimmaat 49 qungasequtilersorpai GPSitalinnik Saqqummersinneqarfia 05.01.2026
Nunatta kitaani, issittumi sumiiffinni kisiartapajaajusumik tuttut umimmaallu nuna ataatsimoorullugu ukioq kaajallallugu uumaqatigiittarput – nunalu qanoq agguataarlugu uumaffigisarneraat paasiniarlugu qungasequtilersorneqarput GPSitalinnik
Pinngortitaleriffik ilisimatusarluni suliamik nutaamik ingerlatsileruttorpoq Sisimiut Kangerlussuullu piniarfigisartagaanni tamani umimmannik 49inik GPSitalinnik qungasequtilersuigamik, tamannalu pivoq oktobarip naalernerani novembarimilu 2025imi. Asimi sulineq ilisimatusartumit Mathilde Le Moullec’imit Pinngortitaleriffimmeersumit aqunneqarpoq, suleqatigaalu uumasut nakorsai København Zoo’meersut Aarhusillu universitetiani ilisimatusartoq.
Qungasequtit GPS-itallit ikkussuunneqarnerisa siunertaraat paasiniarneqarmat umimmaat qanoq sumullu nikittarnersut ukioq kaajallallugu uumaniarnerminni atugarisaat paaserusunneqarami. Paasissutissat takutissavaat nuna uumasunit ukioq kaajallallugu qanoq atorneqartarnersoq., taavalu sumiiffimmiit sumiiffinnut nikittarneri apummit, sermimit silallu allanngorarneranit sunnerneqartarnersut.
– Uumasut qungasequtilersorpagut GPSitalinnik paaserusukkatsigu ukioq kaajallallugu qanoq sumullu nikittarnersut. Avatangiisaallu allannguuteqassappata tamanna qanoq sunniuteqassanersoq aamma paaserusukkatsigu, ilisimatusartoq Mathilde Le Moullec nassuiaavoq.
Uumasut nikittarnerisa saniatigut naasut avatangiiserisaanniittut sorliunersut sumilu ivigartornerusarnersut nerisassaqarluarnersullu paaserusukkamikku. Taakkua saniatigut umimmaat inuit angalanerinik motoritallillu angalanerinik qanoq sunnerneqartigisarnersut paaserusukkamikkit.
– Tamakkua tamarmik paasinarsisittussaavaat uumasut nikittarneri uumaniarnerminnilu atugarisaat qanoq ittuunersut. Mathilde Le Moullec nassuiaavoq.
Issittumi immikkuullarissusilik
Nunatta kitaa, ingammik Kangerlussuup Sisimullu eqqaat, issittumik nunami uumasunik miluumasunik peqarluarnermigut immikkuullarissuseqarpoq, sumiiffiit ilaminiinnarigamikku ukioq kaajallallugu tuttut umimmaallu taamatut uumaqatigiiffiginninnerat. 2024imilu ukiukkut Pinngortitaleriffiup tuttut 40it qungasequtilersorpai GPSimik attavilinnik.
Paasissutissallu pissarsiarineqareersut paasinarsisereerpaat tuttut ukiup qanoq ilineraniluunniit annikitsuaqqamik nikittartuusut, soorlu piaqqiulernerminni aalajangersimasuni sumiiffinni katersuuttartuusut piaqqioqatigiittarlutillu, 2024imi 2025imilu ulloq 28. maj piaqqiffigisarlugu.
Tuttut umimmaallu qungasequsersornerisigut paasinarsissaaq uumasoqatigiit taakkua marluk assigiinngitsuusut nunamik atuinerat qanoq innersoq assersuunneqarsinnaanngortussaassaaaq.
– Nalunaarsukkat tuttuneersut umimmanneersullu atorlugit misissorsinnaalissavarput, nunamik qanoq atueriaaseqarnersut, sumiiffinnilu assigiinni neriniarfeqartarnersut, piffissamik atuinerat nalunaarsorsinnaalissavarput, ullukkaartumik, qaammatilluunniit pingasukkaarlugit aammalu imaluunniit qaammatit arlalikkaarlugit, Mathilde Le Moullec nassuiaavoq.
Siutaanni nalunaaquttat piniartunut pingaaruteqarput
Umimmaat qungasequtilersorneqarsimagaluarlutik asimi qungasequtaat takujuminaattarpoq. Umimmaammi meqquisa torsusuut takeqisullu qungasequtit ersigunnaartittaramikkit, kisiannili tassa siutaanni sungaartumik normulerneqarputtaaq, taannalu erseqqarittaqaaq.
“Nalunaaquttat sungaartut asserneqarnatik takuneqarsinnaasuaannarput. Taamaattumik pingaaruteqarpoq aallaaniarnermi maluginiassallugu umimmak siutimigut nalunaaqutaqarnersoq,” ilisimatusartoq Mathilde Le Moullec oqarpoq.
Ilutigalugu erseqqissarpaa, ilaannikkut siutaani nalunaaqutaa takujuminaasinnaasartoq. Umimmallu qungasequtilik pisarineqartuussappat, taava pisarinnittoq kaammattorusupparput qungasequt GPSitalik ilisimatusartunut nassiutissagaat imaluunniit piniarnermut nakkutilliisumut, UNESCO Park Rangerimut imaluunniit Qeqqata Kommuniata sullissivianut tunniullugu.
Ilisimatusartut umimmaap allerui aamma pissarsiarerusuppaat kiisalu uumasoq pisarineqartoq assileriarlugu paasissutissat uunga nassiullugit: tuttu@natur.gl
Sukumiinerusumik paasisaqarniaraanni attaveqarfissaavoq:
Pinngortitaleriffik; e-mail: tuttu@natur.gl; Oqarasuaat +299 361200
Umimmak tuttuluunniit siutimigut nalunaaqutsigaq asimi takuviuk? Taava nalunaaqutaata normua uumasorlu sumi takunerlugit uunga ilisimatitsisinnaavutit tuttu@natur.gl – taamaaliornikkut pingaarutilimmik ilisimasaqalernissamut ikiuutissagavit.