Timmissanik nalunaaqutsersuisarnerit

Timmissat nalunaaqutserneqartarneri imaluunniit qaammataasanut nassitsissutilerneqartarnerat peqqutaallutik timmissat ingerlaartarfii aammalu timmiaqatigiiaanut arlalissuarnut tunngassuteqartut paasissutissat pingaaruteqartut, assersuutigiinnarlu sumik toqquteqarsimanerannik, ukioqatigiiaat katitigaanerinut tunngassuteqartut allarpassuillumi paasineqartarput. Paasissutissat taama ittut taamaallaat pissarsiarineqarsinnaasarput nunarput tamakkerlugu innuttaasut eqeersimaarlutik suleqataanerisigut. Timmissat nalunaaqutallit nassaarineqartartut amerlasuut nunani allani nalunaaqutsigaasarsimapput.

Kalaallit Nunaanni timmissat niuisigut nalunaaqutserniarneqaleraangamik nalunaaqutassaa Danmarkimi Københavnimiittumi Zoologisk Museumimit (Uumasunik Katersugaasivik) pissarsiarineqartarpoq. Aamma nalunaaqutsiiniarnerneq Namminersorlutik Oqartussat nalunaarutaat nr. 8 2. marts 2009-meersoq timmissat illersugaanerannut piniagaanerannullu tunngassuteqartoq naapertorlugu Aalisarnermit, Pinianermit Nunalerinermullu Naalakkersuisoqarfimmit akuersissummik §20 naaperorlugu peqqaartoqartariaqarpoq.

Timmiaq nalunaarutigeqqiguk

Timmissamik nalunaaqutalimmik pisaqarsimaguit takusimaguilluunniit, tamanna Pinngortitaleriffimmut nalunaarutigiuk.

Nalunaarutiginninniarnermi immersugassaq ugguuna aasinnaavat (pdf – 106 KB)

Nalunaaqutaq pissarsiarerusunneruarput timmissap isigaa ilanngullugu, panertillugu imaluunniit isigak nalunaaqutalik asiunnginniassammat pappiaqqamik poorneqarsinnaavoq.

Paasissutissat uku ilanngullugit Pinngortitaleriffimmut nassiutiguk:

  1. Nalunaaqutaq allataqarsimaguillu ilanngullugu
  2. Timmiaq sorleq – sorliunera nalunngisaq imaluunniit ilimagisaq
  3. Ulloq pisarinerani/nassaarineraniluunniit qassinngornera
  4. Sumiiffik – pisaarfik/takuffik – aammalu illoqarfik qaninnerpaaq nunallu immikkoortuata taagutaa
  5. Peqqutaasoq – paasissutissat allat:
    • Timmissap qanoq innera: uumava, toqungava (toqoqqammersoq imaluunniit qangalili toqungasimasoq), nassaarineqarnermini napparsimarpasippa imaluunniit arlaanik ajoqusersimava
    • Nassaarinerani pissutsit: Aallaasaava, umiarsuarmut aportuua, igalaamut imaluunniit innaallagissat aqqussuinut aportuua, nappaateqarnera ajoqusersimaneraluunniit peqqutaalluni toquttariaqarsimaviuk imaluunniit iperaannartariaqarsimaviuk, nalunaaqutaata normua qinngutikkut imaluunniit assiliutip linsiisigut takusinnaasimaviuk, nalunaaqutaannaq nassaaq assigisaallu.
    • Nassaartup atia, attaviginiarnerani paasissutissat aamma konto nummer, uterfigeqqissinnaaniassagatsigu ilisimatinniarlugu nalunaaquttamut tunngassuteqartunik akissarsiassaanillu tunisinnaaniassagatsigu.

Imaani timmiaq saviminermik nalunaaqutsigaasimappat, normua allassimasullu erseqqilluarsimappata paasissutissat uunga mailerutigineqaannarsinnaapput: info@natur.gl
Akissarsiassanut tunngassuteqartut nutarteriffigineqalermata, taakkununngarpiaq tunngatillugu paasissutissat piareeriarpata ugguunattaaq ilisimatitsissutigissavarput.

Sianerit imaluunniit allagit uunga:

Pinngortitaleriffik
Kivioq 2, Postboks 570
3900 Nuuk, Grønland
Oqarasuuat: 36 12 00

Nalunaarsuerujussuarnerit

Kalaallit Nunaanni timmissat 280.000-nik ikinnerunngitsut timmiaqatigiinnit assigiinngitsunit 53-iusunit saviminernik ammalortunik Zoologisk Museum-imeersunik nalunaaqutsiisoqartarsimavoq. Taamatut nalunaaqutsersuisarnerit 1926-mi aallartinneqarput, Kalaallit Nunaatalu sineriaa tamakkerlugu inuit 300-nit amerlanerusut nalunaaqutsersueqataasarsimapput.

Taama annertutigisumik suliniuteqarnerup kigunerivaa timmissat 15.500-t nalunaaqutserneqarsimasut naneqqinneqarsimammata, taamaalilluni paasineqarluni timmiaqatigiit assigiinngitsut 43-t nalunaaqutserneqarsimasut. Nunatta avataani nalunaaqutsersuisarnerit timmiaqatigiinnik assigiinngitsunik 14-inik allattorsimaffimmi ilatitsisimapput.

Nalunaaruteqaqqittarnerit amerlanerpaartaat peqquteqarput sorsunnersuup aappaaniit 1980 tikillugu timmissanik amerlasoorpassuarnik nalunaarsuisoqarsimammat. Taamaalilluni manna tikillugu timmissat nalunaaqutaannik katersorneqartartunit 50-it 100-llu akornanni nunatta avataani nalunaaqutserneqartarsimasut nalunaarutigeqqinneqartarput.

Timmissanik nalunaaqutsersueriaatsit nutaat

Timmissanik nalunaaqutsersueriaatsit nutaat arlalissuit ukiuni kingullerni 20-ni takkussuussimapput.  Eqqaaneqarsinnaasut makkuupput, qalipallugit nalunaaqutserneqartarnerat, niuagut saviminermik kode-likkamik ikkussilluni nalunaaqutsiineq, taamaattut qinngusersaarnikkut imaluunniit assiliivik atorlugu kode-taat takuneqarsinnaapput, taamaalilluni pisarineqanngikkaluarlutik sumiinnerat nalunaarutigineqarsinnaalersillugit, qaammataasanut nassitsissutit aammalu paasissutissanik katersuutit datalogger-inik taaneqartartut. Nassitsissutilersueriaatsit timmiaqatigiinnik aalajangersimasunik suliniuteqarluniluni ingerlataqarnermi atorneqartarput. Tamakku nalunaaqutsersueriaatsit nutaat akisusinnaasarput, uffa niuisigut saviminernik nalunaaqutsiisarnerit pisariitsunnguullutik ajornannginnerusut. Kisiannili periutsinik nutaaliaanerusunik atuilluni nalunaaqutsikkanit paasissutissanik sukumiinerusunik amerlanersuarnillu piffissami sivikitsuinnarmiluunniit pissarsiviusartut.

Paasissutissanik katersuutinut, dataloggerinut, tunngassutillit allaanerulaartunnguarnut, ullup qaarmangata paasissutissartaanik katersuutinik – lyslogger-it pillugit uani atuagaqarsinnaavutit.