Pinngortitaleriffimmi miluumasunut timmissanullu immikkoortoqarfik sulisussarsiorpoq
Pinngortitaleriffik miluumasunut timmissanullu immikkoortoqarfik ilisimatusartumik septembarip aallaqqaataani sulilertussamik sulisussarsiorpoq. . Atorfinittussap suliniummi ilaatigut timmissat qaasutut Kalaallit Nunaata Kitaata Kujataani uumassuseqatigiit ataqatigiiffianni inissisimanerannik misissuissaaq. Alaatsinaannerni, ilisimatusarnermi siunnersuinermilu suliassanik atorfinittussaq aamma suliaqartussaavoq. Suliffeqarfiit allat suleqatigalugit ilinniartitsinernut peqataasarnissamut periarfissaqassaaq.
Pinngortitaleriffik nunatsinni eqqaanilu pisuussutinik uumassusilinnik, uumasunik, naasunik avatangiisinillu ilisimatusartuuvoq aammalu Naalakkersuisunik suliffeqarfinnillu allanik siunnersuisarpoq. Miluumasunut timmissanullu immikkoortoqarfik uumasut assigiinngitsut inuiaqatigiinnut sunniutillit pillugit atuinissamik mianerinissaannullu tunngasunik ilisimatuussutsikkut siunnersuisarpoq. Suliavut pillugit ilisimasaqarluarnissarput pitsaassutsillu qaffasinnissaa anguniartuartarparput. Nunat tamalaat akornanni sulineq ilungersortitsisinnaasartoq neqeroorutigisinnaavarput, inuiaqatigiinnulli aamma attuumassuteqarluinnartoq.
Piginnaasat
Qinnuteqartoq ph.d.-tut- ilisimatusartuunertulluunniit allagartaqassaaq, timmissanik suliaqarnermik aamma asimi sulinermik ilisimatuussutsikkullu pitsaalluinnartunik allagaqarluni saqqummersitsinermik misilittagaqarluassaaq. Ilisimatuussutsikkullu saqqummiussaqarsimasassalluni. Kisitsisitigut paasissutissat atorlugit uumassusilinnik misissuinerni ilungersortitsisinnaasartuni suleriaatsinik ilisimasaqarluarlunilu ilisimatusartumik kiisalu ajornartorsiutit aaqqiissutissaannik nassaarniarnissamik piumassuseqarluartumik pissarsiorpugut. Nammineq eqqarsarsinnaanissaq, nammineq siulliulluni suleriarsinnaanissaq, kisimiilluni sulisinnaanissaq suleqatigiinnilu suleqataasinnaanissaq piginnaaneqarfigisariaqarput.
Kalaalllisut sapinngisaqarlunilu inuiaqatigiinnik kalaallinik ilisimasaqarnissaa iluaqutaassaaq.
Piginnaasat/misilittakkat allat kissaatigineqartut tassaapput:
- Amerlassuseq aamma uumassusillit akunnerminni pissusilersuutigisartagaat avatangiisaallu pillugit ilisimatusarneq tunngavigalugit misissuinermi periutsit (R-imi programmeeriineq)
- Timmissanik misissuinissamut ilisimatusarneq
- Sumiiffinni ungasissumiittuni tikikkuminaatsunilu kisitsisitigut paasissutissanik katersineq uuttortaanerlu kiisalu paasissutissanik katersuivinnut nassitsisarneq
- Uumassusillit assigiinngitsut sumiiffimmi ataatsimi uumaffigisaasa annertussusaata isumaanik ilisimatusarneq
- Misissueriaatsinik ilisimatusarneq
- Issittumi nunap immikkoortuini asimi misissuinermik misilittagaqarneq
- Allunaasat atorlugit qaqqasiornermik qajannaarsuinermillu misilittagaqarneq
Paasissutissat sukumiinerusut
Atorfik pillugu paasisaqarnerorusukkuit, attaveqarfigiuk immikkoortortami pisortaq Fernando Ugarte, FeUg@natur.gl , imaluunniit ilisimatusartoq Aili Labansen AiLa@natur.gl , , + 299 361200
Qinnuteqarnissamut killissarititaasoq: 15. juuni 2024
Qinnuteqaat, siornatigut sulisimanermut uppernarsaatit – aamma ilinniagaqarsimanermut pikkorissarsimanermullu uppernarsaatit kiisalu paasissutissat attuumassutillit allat una toorlugu nassiutikkit ”Qinnuteqaat nassiuguk”.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut “qinnuteqaat nassiuguk” toorlugu nassiutikkit.
E-mail-ikkut qinnuteqaatinik tigusineq ajorpugut.
