Uumasut nalunaaqutsersukkat
Nalunaaqutaq dataloggererlu. Uumasut nalunaaqutsikkat ilisimatuunut pingaaruteqarluinnarput, taamaattumik nalunaaqutsikkanik siumuiguit Pinngortitaleriffimmut nassiussisarit. Ass.: Pinngortitaleriffik
Ilisimatuut ikiukkit, nalunaaqutamik nassaruit nassiussigit
Uumasunik nalunaaqutsersuisoqartarpoq uumasut ingerlaarneri alliartortarnerilu pillugit paasisaqarumalluni. Uumasorsiuut uumasut nalunaaqutsersuutit assigiinngitsut atorlugit nalunaaqutsertarpaat. Uumasumik nalunaaqutsersimasumik nassaaruit pingaaruteqarluinnarpoq paasissutissat ukua Pinngortitaleriffimmut nassiunnissaat
uunga:
Pinngortitaleriffik
Postbox 570
3900 Nuuk
Qanga sumilu nassaarisimanerlugit ilanngullugit.
Nunatsinni uumasut ingerlaartarneri paasisaqarfigerusullugit periutsit arlallit atorneqarput, soorlu assammiuusanik nalunaaqutsersuinikkut, tag-it atorlugit aammalu satellitsikkut aallakaatitsissutilinnik imaluunniit dataloggerinik nalunaaqutsersuinikkut. Satellitsikkut aallakaatitsissutilinnik dataloggerinillu nalunaaqutsiineq akisunerungaatsiarpoq nalinginnaasumit nalunaaqutsersuinermit. Taamaakkaluartoq atortut taama ittut atorneqartillugit paasissutissat pilertornerusumik pissarsiarineqartarput nalinginnaasumik nalunaaqutsersuinermiit. Paasissutissalli pingaarutillit tamakkua aatsaat atorluarneqarsinnaasarput nalunaaquttat Pinngortitaleriffiup ilisimatusartuinut nassiunneqarpata.
Uumasumik nalunaaqutsikkamik pisaqaraanni qanoq iliortoqarsinnaava?
Siullermik paasissutissat ukua allattorneqassapput: Ulloq, sumiiffik, GPS-ikkut sumiissusersiuteqaraanni imal. kisitsik ilisarnaataa ilanngunneqassapput. Paasissutissat pingaaruteqartut allat tassaapput, takissusaa/oqimaassusaa, uumasoq sunaanersoq, piaraq/inersimasoq (miluumasuni nannut puisillu ilanngullugit), uumasoq qanoq pisarineqarnersoq il.il.
Akissarsiassaq:
Timmiap isigaa nalunaaqutartalik 100kr
Timmiap isigai nalunaaqutartallit 200kr
Timmiaq ilivitsoq satellitsikkut nassitsissutitalik/dataloggeritalik 1000kr
Timmiap satellitsikkut nassitsissutaa/dataloggeritaa 700kr
Aalisakkat nalunaaqutaat (saarulliit, qaleraliit il.il. aamma assagiarsuit) 100kr
Aalisagaq ilivitsoq sungaartumik nalunaaqutalik
(qaleralik aappaluttumik nalunaaqutalik pinnagu) 200kr
Qaleralik ilivitsoq aappaluttumik nalunaaqutalik 400kr
Assagiarsuup nalunaaqutaa 100kr
Aalisakkamiit dataloggeri 300kr
Aalisagartaa ilanngullugu dataloggeri 500kr
Kapisillip nalunaaqutaa NASCO-mi makitsinissamut peqataaneq
Puisimiit nalunaaqutaq 200kr
Puisimiit nalunaaqutaq allerua ilanngullugu 300kr
Puisimiit, arfermiit aavermiilluunniit satellitsikkut nassitsisaat 2000kr
Aavermiit nalunaaqutaq 1000kr
Nannumiit nalunaaqutaq 1000kr
Nannumiit satellitsikkut nassitsisaat 2000kr
Umimmammiit nalunaaqutaq 200kr
Tuttumiit nalunaaqutaq 200kr
Tuttumiit satellitsikkut nassitsisaat (ujamiusaq) 200kr
Ajornanngippat assimik ilanngussisinnaavutit.
Eqqaamallugu paasissutissat ilinnut tunngasut ilanngutissagakkit: Konto nr., tlf.nr., e-mail, adresse
Inussiarnersumik inuulluaqqusilluta
Pinngortitaleriffik
Kivioq 2, postboks 570, 3900 Nuuk, Kalaallit Nunaat
Tlf.: +299 36 12 00 – Fax +299 36 12 12
e-mail: adm@natur.gl