Katersat atorlugit ilisimatusarnissaq Saqqummersinneqarfia 06.11.2024
Issittumi uumassusillit avatangiisaasalu ataqatigiinnerat ukiuni makkunani allanngornernik annertuunik aqqusaagaqarput, ilaatigut nunarsuarmi silap kissassusaata allanngorarnera peqquteqartumik. Imaani miluumasut, nerisareqatigiiaani qaffasinnerpaami inissisimammata imaani miluumasut pillugit ilisimatuutut allaatigineqarnerat iluaqutigalugu uumassusillit avatangiisaasalu ataqatigiinnerat tamaat sunnerlugu allannguutinik takussutissanik siullernik nassaartoqarsinnaasarpoq.
Aningaasarsiutigalugu arfivinnik piniarnerup ukiut 100-t sinnerlugit uninngatinneqareernerani arfiviit Kalaallit Nunaata Kitaani amerlasoorsuakkaarlutik takkusimaartalersimapput. Pingaartumik Qeqertarsuup Tunuata uumassusilinnik annertuumik pinngorartitsinera pissutaalluni arfernut taakkununnga neriniarfittut pingaarutilittut inissisimalersimavoq.
Kalaallit Nunaannili Tunup Kujataani qilalukkat qernertat ukiuni taakkunani killormuanik takussaavallaarunnaarsimapput, ikiliartupiloorlutillu, qilalukkat qaqortat aamma killormuuanik Tunumi takuneqartalersimapput. Kalaallit Nunaanni Tunumi qilalukkat qaqortat qaqutiguinnaq siornatigut naammattoorneqartarsimagaluarput.
Miluumasut imarmiut piaqqiortarneri, toqorartarneri, ingerlaartarneri peeruttarnerilu ukioq 2000miit misissugassanik tigusiffigineqartarsimasut allannguuteqartarsimaner-sut misissuiffigineqartussaapput, miluumasut ilalisaataasa tusindtilikkaanik amerlassusillit Pinngortitaleriffimmit ukiukkaartumik katersorneqartarsimasut atorlugit misissuiffigeqqissaarnerisigut. Misissugassallu tamakkua kalaallit piniartut ikiortigalugit katersorneqarsimapput.
Miluumasut ilalisaataat ukiukkaartumik katersorneqartarsimasut imminnut assersuullattaarnerisigut, uumasoqatigiiaat amerlassusitsimikkut, assigiinngiiaassutsimikkut, ilaqutariissutsimikkut aammalu arnaviat angutiviallu akunnerminni amerlassusaannik nalilersuisoqartartussaavoq.
Misissukkatta inernerisa ilisimasanik nutaanik pingaaruteqartunillu peqartilissavaatigut, soorlu peqassutsip allanngornerinanut tunngatillugu piaqqiortarnerinut, toqorartarnerinut, ingerlaartarnerinut peeruttarnerinullu sunniuteqartarneri suunersut, imaani miluumasut nerisareqatigiiaat qaffasinnerpaami inissisimasut akornganni. Suliniutip atorsinnaanera eqqarsaatigalugu periarfissaqarluarpoq, issittumi imaani uumasunik siunissami ilisimatuussutsikkut aallaavilimmik pinngortitamilu uumassusilimmi assigiinngisitaartunik uumasulimmi nakkutiginninnermut paasisat atorneqarsinnaassammata.
Sukumiinerusumik paasisaqarniaraanni attavigineqarsinnaavoq ilisimatooq Mads Peter Heide-Jørgensen ugguuna: mhj@ghsdk.dk
