*Required
*Required
*Required
*Required
*Required
*Required
*Required
*Required
Send
Thank you for your application!
 

Lene Kielsen Holm pillugu eqqaaniut (1963 -2021)

Ilisimatusartartup Lene Kielsen Holm´ip siusippallaarujussuaraluartumik toquneragut Kalaallit Nunaanni ilisimatusartartut akornanni inummik malunnaateqarluartumik annaasaqartoqarpoq. Lene´mi inuuvoq immikkuullarissoq. Inuuvoq piginnaanilipilorujussuaq, ilisimatusartarnermigullu ilisimalersimasaminik tunioraarusuttorujussuaq. Tupinnaannartumik ilisimasaqarpoq, ilisimatusaatigisartagaalu assorujussuaq tamanit ataqqineqartarlutik. Inuttullu suleqatitullumi Lene´p inuppalaarluinnassusia qutsatigineqartaqaaq. Lene Kielsen Holm kræftemik nappaateqarluni toquvoq. Tamattalu aliasoqaagut.

Lene Kielsen Holm nunat tamalaat akornanni ilisimatusartartutut ataqqisaavoq. Suliarisarsimasamigut paasisimasai annertoorujussuupput. Ilisimasaqarfinni assigiinngiiaani itisuumik ilisimasaqartarnini ataqqinaatigai, assullu ilisimatuussutsikkut suliniutini suleqatigiumaneqartaqaluni. Ilisimatusaaterpassuit nunatsinneersut nunanillu tamalaaneersut Kalaallit Nunaat, ilisimatusaatinik ilisimasanullu tunngatillugu isiginneriaatsinut tunngassuteqartunik ilisimasarpassuinik iluaquserneqartarsimaqaat. Lene´p ilisimatusariaasia inuttaata ilagaa. Ilumuuissumik inuk immikkuullarissuuvoq, qasusuilluni tunniusimangaarluni nakkaannarumanngissuseqartumik eqqarsariartaaseqarnera maqaasissaqaarput.

Ilisimatusarfimmi 2002-mi ilinniagartuutut naammassereernermi kingorna Lene Kielsen Holm Ineqarnermut Atortulersuutinullu Naalakkersuisumut ukioq kaajallapajaarlugu allattaavoq, kingornagullu 2003-mi ICC´mi sulilerluni. ICC´miinnermini suliniut Sila-Inuk aallartippaa. Suliniummut tassunga atatillugu Lene nunatta kujataani avannaanilu piniartunik, aalisartunik, savaatilinnik allanillumi silap pissusiata allanngoriartorneranut tunngassuteqartunik maluginiartagaannik paasisaqarniarluni apersuisarnernik ingerlatsisarluni angalaarfigai.

Pinngortitaleriffiup immikkoortortaani, Silap Pissusianik Ilisimatusarfimmi, Lene ilisimatusartartutut 2012-imi atorfinippoq. Taama atorfeqarnermini ilisimatusaatigalugu suliniutini arlalissuarni Lene akisussaasutut inissisimasarsimavoq, taamaalilluni Kalaallit Nunaallu tamakkipajaavillugu angalasarluni. Lene ilisimasassanik nutaanik, oqaluttuanik nutaanik oqaloqatiginninnernillu nutaanik ”tumisiuillunilusooq” angalajuartuuvoq. Liinaana inuk tusarnaallaqqissorsuaq.

Namminersornerullutik Oqartussat Pinngortitamik Avatangiisinillu Mianerinninneq pillugu Nersornaasiuttagaat siullerpaaq 2007-imi aammalu 2008-mi Wings WorldQuest Award, Amerikkarmiut arnamut ilisimatusartartumut aqqutissiuisumullu nersornaasiuttagaat Lene Kielsen Holm´imut tunniunneqarnikuupput. Aamma 2018-imi Lene suleqatinilu pissarsiariumaneqartaqisumik nunarsuatsinni ilisimaneqarluartumik MOHN Prize´mik Tromsømi Norgemiittumi nersornaasigaapput.

Nersornaat MOHN Prize suliniutip ”The Meaning of Ice” ingerlanneqarneranut atatitaalluni tunniunneqarpoq. Suliniutikkut Issittup imartaata sikua nersorniarneqarpoq, inunnit Canadameersunit, Alaskameersunit Kalaallit Nunaannersunillu kinguaariiaat ilisimalersimasaannik ingerlatitseqqittoqarpoq. Inuit 40-nit ikinnerunngitsut oqaluttuaminnik, eqqumiitsuliaminnik, assamminnik titartakkaminnik, nunap immallu assinginik, assilisatigut allaat iganermut ilinniutitigut ilisimalersimasat ingerlateqqinneqarput.

Lene Kielsen Holmi ilisimatusariaatsit akimorlugit suleriuseqarnernik ukiorpaalussuarni ineriartortitseqataasimavoq, matumani nunaqavissut ilisimasaasa periutsillu ilisimatusariaatsit qanoq akulerunneqarsinnaanerat suleqataaffigisimallugit. Liinap periuseq ”ilisimasanik pilersitseqatigiinneq”, tassa ilisimatusartartut, nunaqavissut, ilisimanneqqaartullu naligiilluinnarlutik suleqatigiissinneqartarnissaat matumani sammineqarpoq. Periuseq namminermi atorfissaminut ajunngilluinnaqqissaarpoq.

Liina nunatsinni ilisimatusartartut akornanni eqeersaasooqataasimavoq, Pinngortitaleriffiullu siulersuisuini 2006-imiit 2012-ip tungaanut siulittaasuulluni, Nunatsinni Ilisimatuussutsikkut Siunnersuisooqatigiinni 2019-imiit ilaasortaalluni aamma. Liina amerlasuunut maligassiuisuuvoq, inussiarnersuujuaannarluni, soqutiginnittuulluni, tusarnaartuulluni tamatigullu ilisimasaminik misilittakkaminillu tunioraasuulluni.

Liina aamma ilaqutserituujuvoq, meeqqanilu marluk Marco Nadialu tulluusimaarluni asannippaluttumillu nipeqarluni eqqartortuartarpai. Erngutaasalu Pinngortitaleriffiup gangersuini nuannaarpalunnerat nipaasarpoq, Aanaa suliaffianut ilagisimariaraangamikku.

Liinap eqqaaneqarnera ataqqinartuuli.

Mie Hylstofte Sichlau Winding                  &          Klaus Nygaard

Silap Pissusianik Ilisimatusarfimmi                      Pinngortitaleriffimmi pisortaq

immikkoortortami ningiu