Mikkel Villum Jensen-imut eqqaaniut Saqqummersinneqarfia 30.07.2025
MIKKEL VILLUM JENSEN (1964-2025)
Arfernik ilisimatusarnermi 1990kunni arferit alaatsinaallugillu misissugassanik tigusiffigineqaannartarneriniit, arferit satellitsikkut attaveqaatilersorneqartalerlutillu assigiinngitsunik uuttuutilersorneqartalerput. Taamaattumik biologit ikiorneqartariaqartalerput paasiniarlugu atortorissaarutit qanoq ilusilersorneqarlutik arfernut ikkussuunneqarsinnaanngortinneqarsinnaanersut, arferillu annerit sumi tamaani angalaartut qanoq nalunaaqutsersorneqarsinnaanersut inerisarneqalersimallutik.
Mikkel Danmarks Designskolemi naammasserlaajugami inuunini tamaat imaani pisunik tiguarteqqasuaannarsimavoq. 1999-milu aperineqarami arfernut atugassanik satellitsikkut attaveqaatiliorsinnaanersoq immaqalumi Kalaallit Nunaannut misilittariartorusunnerai aperineqarami erngerluni akuersaarluni akuliuppoq.
Tassa taamanimiit arfernik misissuinissamut atortussanik ilusilersuisuulerluni ’designerinngorpoq’ mekanikeritullu aallussilerluni. Suliaasa siulliit ilagaat aallaasiusamik silaannalimmik (ARTS) arferit annerit orsuinut kappunneqarsinnaasunik inerisaaneq. Aallaat silaannalik kingusinnerusukkut ilisimatuussutsikkut allaaserisami ilaatinneqarput ullumilu tikillugu Pinngortitaleriffimmiit saqqummiunneqarsimasuni tamanit taanna issuaaffigineqarnerpaajulluni. Aallaat silaannaligaq arfivinnut nunatsinnilu arfernut annernut allanut atorneqaqqaarpoq, ullumikkulli nunarsuaq tamakkerlugu atorneqartalersimavoq arfernik tusindtilikkaanik nalunaaqutsiinernut atorneqartarluni.
Aallaat silaannartalik biologinut naammassimanngilaq, tassani annerusunik oqimaannerusunillu arfernut ikkussinissartik kissaatigisaramikku. Taamaattumik Mikkel’ip isumassarsiaralugu suliaraa taaneqartartoq ’villum-pole’, taanna takkajaarsuuvoq 8 meterinik takissusilik glasfiberimik sanaaq, windsurferutinut napparutaasartunik marlunnik katitigaq. ’Villum-polen’ Kalaallit Nunatsinni misilittaqqaarneqarpoq, kingornali aamma ilaatigut Alaskami, Brasiliami, Islandimi Mauritiusimilu atorneqartalerluni.
Mikkel’ip aamma arfernut nalunaaqutaasussat ilusilersorpai, elektronikkiliortut nunatsinnilu piniartut arfernik ilisimannilluartut attavigilluartarlugit qangali piniutigisartagaat isumassarsiorfigalugit nalunaaqutassaannik ilusilersuisimavoq. Nalunaaqutsiussassat ineriartortinnissaannut pingaaruteqarsimaqaaq Mikkel’ip angalaaqataasarsimanera aammalu nalunaaqutsersuinernut peqataasarsimanera, taakkununngaannanngitsorli aammali nalunaaquttat mekanikkikkut elektronikkikkullu sananeqaataasa ilusilersorneqarnissaannut Mikkel-ip imaani sulinermut misilittagaqarnera pingaaruteqarluinnarsimaqaaq.
Mikkelip Pinngortitaleriffimmi siunnersortitut sumiiffinni assigiinngitsorpassuarni sulilluni misilittarsimavaa. Qeqertarsuup Tunuani qipoqqaat arfiviillu nalunaaqutsersorneqartarnerinut, Nuummi Sisimiunilu taaneqareersutut tikaagulliusaanut tikaagullinnullu nalunaaqutsersueqataasarpoq, Qaanaami aarrit qilalukkallu, Niaqornani qilalukkat qernertat nalunaaqutsersortarsimavai Pinngortitaleriffiullu illuutaa allanngorsarlugu suliarisimallugu, Qimusseriarsuarmi Kangerlussuarmilu Tunumiittumi qilalukkat qernertat nalunaaqutsersortarsimavai. Imaq imaanilu angalaneq nalunngisaqarfigilluaramigit ataqqineqalertuartarsimavoq, inuunermik nuannarinninnerujussua ingasanngikkaluarmik eqqumiissinnaasunik periusersorsinnaanera eqqisseqqinnaarlunilu inooriaaseqarnerata inuunerani matorpassuit ammaatitsitertarsimavaat. Mikkelilu ilaagaangat illartoqartaqaaq, Kalaallillu Nunatsinni taamaannerata ikinnguterpassuaqalersissimavaa. Naallu Mikkeli arfernik ilisimatusarnerup silarsuaani nunarsuaq tamaat angalaffigisimagaluarlugu, Kalaallit Nunaat ’ilinniarfigilluarsimavaa’ tamaanilu angerlarsimasutut misigisuarsimalluni.