NAFO’p ilisimatuussutsikkut siunnersuisoqatigiivisa nunatta kitaani 2026imi 75.000 tonsit pisassiissutigineqarnissaat innersuussutigaat, taamaasilluni innersuussutit 2025imut naleqqiullugu 5.000 tonsinik ikileriaateqassallutik. Pisassiissutissatut innersuussutaasut kisitsisilerneqarsimapput naatsorsuinerit aallaavigalugit, naatsorsuinernilu takuneqarsinnaavoq raajaqassuseq amuneqartartullu amerlassusaat ikiliartortut, taakkununngalu ilaliullugu ukiuni kingullerni saarulleqarnerulernikuuvoq, taakkualu raajatorluarnissaat naatsorsuutigaarput.

NAFO’mi ilisimatuussutsikkut ataatsimiitsitaliap siorna siunnersuinermini periuserisimasaa aallaavigissagaanni taava Tunumi raajat 2026imi kilisanneqartussat 500 tonsit qaangissanngikkaat innersuussutigineqarpoq, tassa 2025imut innersuussutaasimasut affaannaannik amerlassuseqartussat. Tunumi nalunaarsukkat takutippaat raajat 2025imi oqimaassusinngortikkaanni appasittorujussuarmi inissisimasuusut. Raajaqassutsimullu sanilliullugu peqassutsimut naleqqiullugu annertunerpaamik kilisattoqarpoq. Biologit peqassutsimik misissuinerisa aammalumi raajarniartut nalunaarsugaat malillugu raajaqassuseq sumiiffimmi aalajangersimasuminnerusoq, tassalu Dohrn Bankemiinnerusuuvoq.

Ilisimaneqareerpoq ukiut ilaanni raajanik pisaqarnerusoqartarlunilu ukiut ilaanni pisaqartoqarpiarneq ajortoq. Assersuutitullu oqaatigisinnaavarput Nunatta Kitaani ullumikkut raajaqassuseq ukiut qulit matuma siornatigutulli inissisimalluinnartutut oqaatigineqarsinnaammat. Siunnersuinermi 2025imeersumi 60.000 tonsit innersuussutigineqarsimapput, ukiunilu tulliuttuni peqassuseq siunnersuinerlu 115.000 tonsinngorsimapput, tassa 2021imi aammalu 2022imi. Ukiullu taakkua kingornatigut peqassuseq siunnersuinerlu appariartulersimapput.

Siunnersuineq Naalakkersuisunut tunniunneqareerpoq, taakkualu nunatsinni raajat qassi tonsit pisassiisutaassanersut aalajangigassaraat.

Siunnersuineq tamakkerlugu uani atuarsinnaavat

Sukumiinerusumik paasisaqarniaraanni attavigineqarsinnaavoq:

Aalisakkanut Qalerualinnullu Immikkoortortaqarfimmi Siunnersortaaneq ilisimatusartorlu AnnDorte Burmeister oqarasuaat +299 361200 imaluunniit mail: anbu@natur.gl aqqutigalugit.