Unnuk Kulturisiorfimmiit assit takukkit Saqqummersinneqarfia 24.01.2020

Atuartut angalanissaminnut aningaasanik katersiniartut kaagiliaminnik tuniniaapput, sutortarfimmilu issiaartut issiaatigalutik assit Fernando Ugarte’p assilisai saqqartinneqaqattaartut isiginnaarneqarsinnaavaat. Assiliisoq: F. Ugarte

Assit saqqartinneqaqattaartut kusanarluinnartuupput

Kaffisortut ilaat tunuani assiliaq timmiartalik saqqarsimasoq. Assiliisoq: F. Ugarte

Amerikamiut ilisimatusartartut ukiuni qulini nunatta sermersua ilisimatusarfigeriigartik saqqummiussaqarfigaat. Qalasersuullu sikutaata ukiuni 20ni kingullerni qanoq millisimatiginera ukiullu 20it qaangiuppata qanoq mikitigilersimanissaa aamma takutippaat. Assiliisoq: F. Ugarte

Qaqorteqqasut karsimut ikillugit nikisinneri tamaasa nunap assinga allanngorartuartoq meeqqat assut alutoraat. Assiliisoq: F. Ugarte

Uumasorsiooq AnnDorte saattussat pillugit inuppassuarnut saqqummiussiinnavippoq. Assiliisoq F. Ugarte

Nynne pinngortitami misissuisarnerit pillugit oqaluttuaqattaarpoq assut soqutigineqartartumik. Assiliisoq: F. Ugarte

Amerikamiut assut tupaallaatigaat kalaallit taamak amerlatigisut tuluttut oqaluussinnaasaramikkit. Assiliisoq F. Ugarte

Kalaallit Nunaata asserujussua GEUS-ikut iigarsuarmut nivinngaqqavaat, tassani aatsitassat sorliit sumiinnersut takuneqarsinnaapput. Assiliisoq F. Ugarte

Uiluiit mikisut, saattuaaqqat kiisalu eqqusat meeqqanit assorsuaq soqutigineqartarput, uani aamma assut nuannarineqarput. Assiliisoq E. Løvstrøm

Uumasorsiuup Julius Nielsen-ip ilinniartuunermini aasakkut misissuutitoqarsuarmi Paamiuni sulinermini piumassutsiminik assilisarsimasani nunatta imartaata naqqani uumasut siullerpaamik Pinngortitaleriffimmi saqqummersinneqarput. Assit maannakkut ataavartumik Pinngortitaleriffimmi saqqummersinneqartuartussanngorput Pinngortitaleriffimmi. Assit kusagineqaqaat. Assiliisoq: E. Løvstrøm

Saattussat meeqqanit nuannarineqartuaannarput. Unnullu naallugu AnnDorte suliani pillugit oqaluttuartuarpoq. Assiliisoq E. Løvstrøm

Qaqorteqqasut illuarteqattaarlugit sekundtimiit sekundtimut nunap assinga allanngorartuartoq meeqqanit nuannarineqaqaaq, unnullu naallugu nunap nassiliortoqaqaaq. Assiliisoq E. Løvstrøm

Maia David-lu immap naqqaniit sioqqanik aatsitassarsiornermi qanoq qalluisoqartarnersoq meeqqanut misilittartippaat. Assiliisoq: E. Løvstrøm

Eqalussuaq qaamasoq ammarterneqarpoq. Inoqarnermilli tullissaani uumasunik annerusumik takutitsisoqassappat inimi annermi takutitsisoqassasoq aalajangiunneqareerpoq. Assiliisoq E. Løvstrøm

Nunatta eqalussuaa aamma ammarterneqarpoq

Aviâja Kanuthsen makitsinermi ajugaasuuvoq. Aviâjap eqqukkani nuannaarutigeqisani aagai aajuna. Assiliisoq E. Løvstrøm