Igutsaat marriortartut Narsamiittut Saqqummersinneqarfia 25.07.2024

Foto: Erna Fontajn
Foto Erna Fontajn
Photo James Bailey
Narsami illup toqqaviani igutsaap marriortartup qullugiaa nerisassaalu
Igutsaap marriortartup ullui Narsami illup toqqaviani cementimi. Ullumi ataatsimini mannik ataasiusarpoq. Assiliisoq Erna Fontajn
Isutsak marriortartuaraq. Assiliisoq: Erna Fontajn
Igutsaap marriortartut ulluliai europami imaattuusaraluarput

 

Narsami innuttaasut Inissiaatileqatigiiffimmut, kommunemut Pinngortitaleriffimmullu saaffiginnissimapput igutsaat titarnillit qanillattortarneri ajornartorsiutiginerarlugit.  Inuit ilaasa ajornartorsiutertik namminneq misissuiffigisimavaat isumaqarlutillu igutsaasaq qaasuttoq asiatiske gedehams, Narsamut takkusimaartoq. Assilli Pinngortitaleriffimmut nassiunneqarsimasut malillugit taakkoorpasinngillat. Assilineqarsimasummi tamarmik tassaapput pottemagerhvepse, igutsaat marriortartutut qallunaatut taaneqartartut (marraq atorlugu ulluliortaramik).

Igutsaat marriortartut ukiut 20it matuma siornatigut Kangerlussuarmiinnaq naammattoorneqartarsimapput. Kisiannili soorlu igutsaasaq pillugu nutaarsiassaatitsinnitut, igutsaat marriortartut nunatsinni aamma nalinginnaanerulersimapput – amerlassutsimikkut siaruaassimanermikkullu. Narsamiimmi saaffiginnissutit tamanna paasinarsisippaat.

Igutsaasat igutsaallu marriortartut ilaqutariiupput qanigisariilluinnartutut taaneqarsinnaasut, igutsaalli marriortartut kisimiinnerusarput tassa ”anaanaq kisimiittuusaramik”, kinguaaminnik kisimiillutik isumaginnittuusartut. Arnaviat marraq atorlugu qaarsuni ’ulluliortarput’ – imaluunniit Narsamisut illup toqqaviisa qupinerini itersaaniluunniit ulluliortarput. Igutsaap arnaviap ulluni piareeraangamiuk pakkalukkat sikannertuulluunniit qullugiaannik nukillartitaminnik immertarpaat ataatsimillu manniliorfigalugu. Taava ulluni matusarpaa. Igutsaap marriortup qullugiaa tukeraangami quperlunik arnami takussiussaanik uumassuteqartarpoq. Taamaattumik igutsaat marriortut miluuttutut taaneqarsinnaapput, allat piarassaannik pinngortitatik nerisaqartittaramikkit. Palugaq qasertup qullugiai nunatsinni naanernik nungutitsilluarsinnaasartut aamma piaqqaminnut nerisassanngortittarpaat. Tamanna iluaqutaasussatut eqqaamasariaqarpoq aamma.

Igutsaat marriortut uppatimikkut kapuuteqarput, tassuminngalu qullugiat nukillaartittarpaat manniliorlutillu. Narsami najugallit ilaasa misilissimavaat igutsaat kapuutertik illersuutigigaangamikku qanoq annernartartigisarnersoq. Igutsaallu aatsaat ulorianartorsiortutut misigisimagaangamik kapisisarput. Taamaattumik igutsaat marriortartut eqqissisimatiinnaraanni qanillinaveersaarlugillu ajunnginnerusarpoq. Imminnummi paarerusaaginnartartuupput – maaniittuartussanngorlutillu takkussimagunarput.