Silassorissuusianik miluumasut alaatsinaanneqarsinnaanngornissaat suliniutigineqalersoq Saqqummersinneqarfia 13.11.2024
Suliniutip AURA AI-p maskinatigut ilinniagassaasinnaasuni teknologi nutaaliaanerpaaq silassorissuusiarlumi atortorissaarutitut atorlugit nipinik alaatsinaannerit nunatsinni imaani miluumasut nutaaliaasumik misissuiffigineqalerput. Uumasut nipai sukumiisumik misissuiffigeqqissaarnerisigut uumasut najuunneri, uumariaasii siaruarsimassusaallu pillugit ilisimatusartut pingaaruteqartumik ilisimasaqarlualersinnaalerput.
AURA AI-suliniummi issittumi nipit assigiinngilluinnarlutillu immikkuullarilluinnartut samminerusussaavaat: qilalukkat qernertat makkuallattutut nipiliortarneri, arfiviillu erinarsortarneri immikkuullarissut aallunneqartussaagamik. Silassorissuusiat maskinallu atorlugit taakkua nipiliornerisa automatiskimik ilisarisaralugit immikkoortinneqarsinnaalernissaat anguniarneqarpoq, taamaalilluni ilisimatusartut imaani arferit suussusersillugillu nakkutigisinnaanerulersinnaaniassammatigit.
Sakkussat silassorissuusiat atorlugit qilalukkat nipiliortarneri malillugit qanoq amerlatiginerannut misissuinerni atorneqartartussaapput. Taamaalillunilu uumasoqatigiiaat immikkuullarilluinnartut piujuartinniarneqarnissaannut nalilersuinermut ilalersuutaasussaassallutik. Aammattaaq arfiviit uumariaasii misissuiffigineqarlutillu imminnut attaveqariaasiat paasiniarluarneqartussaassaaq.
Silap allanngoriartornera sukkatserujussuarpat issittumi uumasut ajornartorsiutinik annertusinnaasunik atugaqaleriaannaapput. Taamaattumik issittumi miluumasut ilisimatusarfigineqarnissaannut periusaasinnaasut nutarsarneqarnerinut suliniut AURA AI pingaaruteqarluinnartumik inissisimasussaavoq, taakkuami uumasoqatigiiaani pingaaruteqartutut inissisimasuummata kiisalu kulturikkut aningaasarsiornertigullu issittumi pingaaruteqarluinnartuullutik.
Suliniummi København Universitet’imeersut Pinngortitaleriffimmeersullu suleqatigiittussaapput. Danmarks Frie Forskningsfond suliniummut aningaasaliisuuvoq.
Sukumiinerusumik paasisaqarniaruit attavigisinnaavat:
Miluumasunut timmissanullu Immikkoortortaqarfimmi ilisimatusartuuneq Outi Tervo, outi@ghsdk.dk
