Alaatsinaanneq

Alaatsinaanneq – imaluunniit misissuineq – ataavartumik misissuilluni katersinerullunilu paasisanik nalilersuineruvoq, misissukkanut sunulluunniit tunngasoq. Alaatsinaannerup siunertaraa paasiniassallugu qanoq allannguuteqartoqarnersoq – soorlu amerlassutsitigut allannguuteqartoqarnersoq paasissallugu katersukkatigut paasisat aallaavigalugit. Ukiuni arlalinni alaatsinaattoqartillugu, taava ataavartumik piffissamit aalajangersimasumeersumit paasissutissanik katersukkanik peqartoqalertarpoq. Taannalu piffissap ingerlaarneranik taaneqartarpoq. Piffissallu ingerlaarneri Pinngortitaleriffiup suliaasa suulluunniit qiteralerai, taakkuami Namminersorlutik Oqartussat siunnersorneqarnissaannut qulakkeerinnittuusarmata.

Angalanermi ataatsimi paasisat katersorneqartut ukiunilu arlalinni paasisat katersorneqarsimasut atorneqarsinnaanerat imaluunniit nalingat assigiinngeqaat. Assersuutigalugu Kitaani qilalukkanik qernertanik ataasiarluni misissuinermi paasinarsisarpoq qilalukkat qanoq amerlatiginersut, aammalu imaassinnaavoq sinerissami qanoq agguataarneqarnersut aamma paasineqartoq. Kisitsinerlu ukiuialunnguit qaangiunneranni ingerlateqqikkaanni paasinarsisarpoq amerliartortunik ikiliartortunilluunniit peqassuseqarnersoq. Kisitsinerit ataavartumik ukiuni arlalinni ingerlanneqartarpata taava paasinarsisarpoq piffissap ingerlaarnerani peqassuseq qanoq allanngorartiginersoq qanorlu nikikkiartortoqarnersoq.

Piffissap ingerlasup sivitsoriartornera malillugu aalaatsinaanneqartunut tunngatillugu paasissutissat pitsaanerulerlutillu eqqornerulertarput, alaatsinaannermullu piffissaq atugaq sivitsoraluttuinnartillugu paasissutissat pitsaanerit sukumiinerusullu pigineqalertarput, taamaalillunilu siunnersuinissamut toqqammavigissaartoqarnerulertarluni. Kisianniuna alaatsinaannerit piffissallu ingerlaarnera malillugu nalunaarsuinerit akisoorujussuusut. Raajat aalisakkallu alaatsinaassagaanni taava kilisaat ukiumi ataatsimi qaammatit 3-4 atorneqarsinnaasariaqarpoq, arfernillu nalunaarsuinerni timmisartut pisariaqartinneqartarlutik, (ukiumi ataatsimi qilalukkanik qernertanik misissuineq 1. million kronet missaannik akeqartarpoq!) Taamaattumik Pinngortitaleriffimmiit uumasut inuiaqatigiit aningaasarsiornerannut kulturiannullu pingaaruteqartut alaatsinaanneqartarput.

Raajat, aalisakkat, miluumasut timmissallu Kalaallit Nunaanni aningaasarsiutaasinnaasut Pinngortitaleriffiup alaatsinaattarpai. Amerlanertigullu uumasoqatigiiaani ataatsini uumasut ataasiakkaarlugit kisinneqartarput uumasoqatigiiaat amerlassusaat alaatsinaanniarlugu, amerlassusaasalu ilisimanissaat pingaaruteqarluinnarput piujuartitsisisumik pisassiisoqarsinnaaneranik naatsorsuisoqarnissaanut amerlassusaat atorneqartaramik. Alaatsinaattoqarnerani uumasut katersorlugit nalunaarsuusiortoqartillugu uumasut ataasiakkaat angissusaa, oqimaassusaat, ukiui, suiaassusaata inerisimassusaat il.il. nalunaarsorneqartarput. Taakkuami uumasut amerliartornerannut kinguaaqarnerannut tunngasunik qanoq inissisimanerinut amerliartorneranulluunniit ilisimatitsisinnaasarmata.

Pinngortitaleriffik alaatsinaattarpoq Kalaallit Nunaata pisussaaffigigamiuk uumasut piujuaritsisumik ingerlanneqarnissaat uumasoqatigiiaallu assigiinngiiaartuunissaat aamma nunatta pisussaaffigimmagu, aammalu Kalaallit Nunaat arlalitsigut nunanut tamalaanut tunngasunik pisussaaffeqarami. Nunarpulli aamma miterniartitsillunilu arfanniartoqartitsissaguni, taava nunarput pisussaaffeqarpoq nunat tamalaat siunnersuinermut periusaanik malinnissalluni peqassutsillu alaatsinaassallugit. Taamaattumik politikkimut aningaasarsiornermullu tunngatillugu nunatta alaatsinaattussaatitaanera isumaqarluarpoq.

Piffissallu ingerlaarnerinut tunngasut Kalaallit Nunaanni atorneqartartut aamma nunatta avataani atorneqartarput, assersuutigalugu ilisimatusartartut paaserusukkaangamikku immap nillissusaa kissassusaaluunniit ilutigalugu aalisakkat miluumasullu Atlantikup avannaaniittut piffissap ingerlanerani allanngoriartortarnerat taakkua atortarpaat. Piffissalli ingerlannerani paasisat Pinngortitaleriffiup Namminersorlutik Oqartussat siunnersorneqarsinnaanerannut qulakkeerissutitut toqqammaviunerusarput.