Avatangiisit

Illu pingaarneq

Illu pingaarneq 2.000 kvm-inik angissusilik 1998-imi atoqqaarfissiortinneqarpoq. Suliffeqarfiup ingerlatinneqarneranut atortorissaarutit pisariaqartitat tassaniipput allaffiit, laboratoriat, qerititsivik, toqqorsivik, atuagaateqarfik aammalu ataatsimiittarfiit.

2008-mi Pinngortitaleriffiup allissutissaa 820 kvm-inik angissusilik sanaartorlugu aallartinneqarpoq,  taakkua sananeqarput Aage V. Jensens Fondit aningaasaliineratigut.

Illu pingaarneq pillugu paasissutissat allat atuakkit.

Illu allissut pillugu paasissutissat allat atuakkit.

Pinngortitaleriffik Nuummiittoq mittarfiup Nuussuullu akornanni kusanarluinnartumik inissisimavoq. Ass.: Carsten Egevang.

Sanilequtaq

Pinngortitaleriffiup sanilequtaa angisuumik ataatsimiittarfeqarpoq. Sanilequtamiipputtaaq garagea, inissiat 5-it, ineeqqallu 8-t ilisimatusariarlutik tikeraartut attartortagaat. Sanilequt 2000-imi atoqqaarfissiortinneqarpoq 850 kvm-inillu angissuseqarluni.

Anneksi Pinngortitaleriffiup suliaanut tikeraarlutik ilisimatusariartunut ineqarnerup tungaatigut periarfissiilluarpoq. Anneksi Pinngortitaleriffittut Aage V. Jensenip Fondiinit aningaasaligaavoq, illulu pingaarneq sananeqaatimigut assigalugu marlunnik quleriittaqarluni.

Unnuisarfik Sanilequtaq Pinngortitaleriffiup eqqaaniittoq 2000-imi atulerpoq.

Biologstationi

Pinngortitaleriffiuttaaq illuutigaa Biologstationi Nuummiittoq. Taanna siusinnerusukkut laboratoriatut, toqqorsivittut aammalu biologinut Kalaallit Nunaanni aalisakkanik misissuillutik angalasunut akunnittarfittut atorneqarpoq. Maannakkut illu Pinngortitaleriffiup pisortaata angerlarsimaffiatut atorneqarpoq.

Angallataasivittaaq

Pinngortitaleriffiup Poorsimaani Nuummi talittarfimmi 19. juni 2012 angallataasivik inissiivillu nutaaq atoqqaarfissiorsinnaanngorpaa. Angallataasivittaaq pilersinneqarpoq Aage V. Jensenip aningaasaateqarfiata 7,5 mio.kr.-nik tunisinera, Namminersornerullutillu Oqartussat toqqaviata suliarineranut sanaartorfigiuminarsarnaranullu aningaasaliinerat iluaqutigalugit. Kommuneqarfik Sermersuup suleqatigineratigut umiatsianut amoortaat angallataasiviup sanianiittoq tamanut atorneqarsinnaasoq pilersinneqarpoq.

Angallataasivik 220 kvm-nik angissuseqarpoq, saniatigut illup qutsissortaani inissiivissaq 93 kvm-nik angissusilik ilanngukkaanni tamakkerluni 425 kvm-nik angissuseqarluni. Angallataasivik Pinngortitaleriffiup angallataannik minnerusunik, gummibådinik assigisaannillu ukiukkut imaqartassaaq. Iigartaani pallenik reoleqarpoq, ilisimatusarluni misissuinerni atortussanik inissiiviusinnaasunik. Saniatigut illu sulliveqarpoq, allaffik uffarfillu, angallatinik atortunillu aserfallatsaaliuineq illup iluani aamma ingerlanneqarsinnaaniassammat. Amoorut ninngusooq angallatinik talittarfimmiit illumut ningitsisinnaavoq.

Angallataasivittaaq. Assiliisoq: K Nygaard.

Kangerluarsunnguami Nuup eqqaani illu misissuiffik

NuukBasic’imut tunngatillugu Kangerluarsunnguami misissuinermut tunngatillugu illuliortoqarpoq aasaq 2009 naammassisimasussamik.

Paasisaqarnerusukkuit uani atuaritillu misissuiffik

Kangerluarsunnguani misissuiffittut ilisimatusartarfik.

Niaqornani illu misissuiffik

1. november 2007 Pinngortitaleriffiup Niaqornani Uummannap pigisaani illu type Illorput 82 aaqqissuuteriarlugu illu misissuiffik najugaqarfiutigisinnaasoq atoqqaartippaa.

Biologit Niaqornat allaavigalugit piniakkat avatangiisillu piffissami sivisunnerusumi misissuiffigisinnaalerpaat. Pinngortitaleriffiuttaaq piniartut biologillu suleqatigiinnerulersinnaanerat neriuutigaa, aammalu biologit suleriaasiinut piniartullu atugaannut paasinninneq annertunerulerumaartoq.