Miluumasunut Timmissanullu

How to apply

Qipoqqaq.

Immikkoortortaqarfimmi Pinngortitaleriffiup uumasunik miluumasunik imarmiunik nunamiunillu, timmissanik naasunillu atuinermi ilisimatuussutsikkut siunnersuisarneri suliarineqartarput.

Immikkoortortaqarfimmi uumasoqatigiinnik inuiaqatigiinnut pingaaruteqartunik pingaarnertut suliaqartarpoq, aningaasalli killeqarneri pissutigalugit uumasoqatigiit atorneqartut tamaasa pillugit ingerlaavartumik misissuisoqarsinnaanngilaq.

Ukiuni kingulliunerusuni sulineq

Ukiuni kingulliunerusni sulineq qilalukkanut qaqortanut qernertanullu, arfernut angisuunut, aarrinut, natsersuarnut, aataanut, tuttunut, umimmannut, appanut, taateraanut, miternut nalinginnaasunut imeqqutaallanullu sammitinneqarpoq.

Tamatuma saniatigut uumasoqatigiit killilersugaanngitsut pillugit avatangiisilli eqqarsaatigalugit nalinginnaasumik aqutsinermut tunngasut pillugit Namminersorlutik Oqartussanut immikkoortortaqarfimmit siunnersuisoqartarpoq ikiuuttoqartarlunilu, soorlu nunat tamalaat akornanni isumaqatigiissutit ilaannut tunngatillugu Kalaallit Nunaata akisussaaffii aamma Kalaallit Nunaanni uumasut naasullu qanoq ittuuneri malillugit nalunaarsuinerit. Immikkoortortaqarfimmi arlalinnik suliaqartoqartarpoq.

Utoqqaassusiliinerit, meqqilersuinerit, nakkutilliineq

Tamakku ilaatigut tassaapput puisit, qilalukkat qaqortat qernertallu aamma tuttut kigutaat aallaavigalugit utoqqaassusiilinerit, timmissat timimikkut qasujaassusaannik naliliinerit, paasissutissanik qarasaasiamut ikkuissinerit, uumasoqassutsinit misiligutissatut tigusanik suliaqarnerit, piniartut pisaasa amerlassusaannik misissueqqissaarinerit, meeqqilersuinerit uumasoqassutsinillu misiligutissanik tigooqqaanerit kiisalu aalajangersimasumik nakkutilliinissanik pilersaarusiornerit piviusunngortitsinerillu.

Ilisimatussutsikkut ilanngutassiat nunanilu tamalaani ataatsimiinnerit

Tamatuma saniatigut immikkoortortaqarfimmit ilisimatusaatinik nutaanik, nalunaarusiornernik, ataatsimiinnernit paasissutissanik, ilisimatuussutsikkut ilanngutassianik siunnersuinernillu ingerlaavartumik pilersaarusiortoqartarpoq suliaqartoqartarlunilu kiisalu nunani tamalaani ilisimatuussutsikkut ataatsimiinnernut peqataasoqartarluni.

Qaammataasakkut nassitsissut arrinut ikkunniarneqartoq.

Piniartunik suleqateqarneq pingaartinneqarpoq

Misissuinerit ilaat illoqarfinni nunaqarfinnilu piniartut piniarfinnillu nakkutilliisut suleqatigalugit ingerlanneqartarput. Taamaalilluni Pinngortitaleriffik illoqarfinni nunaqarfinnilu piniartunik isumaqatgiissuteqarsimavoq, taamaalillutik tamakku sumiiffinni arlalinni meqqit, tuttut, umimmaat puisillu erniorneri pillugit atortussanik paasissutissanillu katersisarput. Aamma natsersuarnik qilalukkanillu qernertanik qaammataasakkut malinnaanerit illoqarfinni nunaqarfinnilu piniartut qanimut suleqatigalugit ingerlanneqartarput.
Piniartut paasissutissaataat Pinngortitaleriffiup siunnersuisarneranut tunngaviupput. Pinngortitaleriffimmi taamatut suleqatigiinnerup ingerlaavartumik annertusarneqarnissaa sulissutigineqarpoq kiisalu piniartut biologillu akornanni paarlaasseqatigiinnerit ilisimasallu annertusarneqartuarput. Tamanna ilaatigut suliat aallartinneqarsimasut pillugit illoqarfinni nunaqarfinnilu piniartunik toqqaannartumik attaveqarnerunikkut pisarpoq.

Suliat tikillugit sulinerit soqutigisaqaqatigiinnillu ataatsimeeqateqartarneq

Tamatuma saniatigut sulisut illoqarfinni suliat tikillugit sulinernut tunngatillugu illoqarfinni soqutigisaqaqatigiinnik ataatsimeeqateqarnissaq tamakkununngalu tunngatillugu isumasioqatigiinnut assigisaannullu peqataanissaat pingaartippaat.

Suleqatit

Immikkoortortaqarfiup Attaveqarnermut Avatangiisinulli Naalakkersuisoqarfik aamma Aalisarnermut, Piniarnermullu Nunalerinermullu Naalakkersuisoqarfik suleqatigaat, aammalu DMU-mik, Ilisimatusarfiit ilaannik aamma nunani allani ilisimatusarnikkut suliaqartunik qanimut attaveqarluni.

Ilisimatuussutsikkut nunani tamalaaneersunit suleqateqarneq siunnersuisarneq pillugu

Sulisut miluumasunik timmissanillu immikkoortortaqarfiup suliarisaanut ilisimatusarneq siunnersuisarnerlu pillugit nunani tamalaani ilisimatusarnikkut sulinernut peqataapput. Immikkoortortaqarfik nunani tamalaani ilisimatusarnermik suliaqartunut tullinnguuttunut makkununnga suleqataatitaqarpoq:

Taateraarnaq nalunaaqutsigaq pisareqqinneqartoq.