Aalisakkat qaleruallillu

How to apply

Tunumi kilisaatersorlutik misissuisut.

Immikkoortoqarfik siunnersuisarnermut akisussaavoq

Uumasut aalisarnikkut inuiaqatigiinnut pingaaruteqarnerpaat iluaqutigineqarnerat illersorneqarnerallu pillugu ilisimatuussutsikkut siunnersuisarnermut immikkoortortaq akisussaavoq. 2007-imi suliat raajat, qalerallit, assagiarsuit aammalu suluppaakkat ilisimatusarfigineqarnerannut tunnganeruupput. Tamatuma saniatigut immikkoortortamiit uumasut annikinnerusumik sammineqartut tassaapput nipitsat, uiluiit aammalu kapisillit.

Aalisarnermit, namminerlu misissuinermit paasissutissat

Ilisimatuussutsikkut misissuisut siunnersuisarnerminni paasissutissat aalisarnermit pisut aammalu biologit ilisimatuussutsikkut misissuinerannit pisut atortarpaat. Misissuinernit paasisat nunat tamat ilisimatuussutsikkut suleqatigiiffiini saqqummiunneqartarput ilisimatuunillu nunanit allanit ilaasortaasuneersunit uumasut assigiinngitsut qanoq issusiisa allanngoriartornerisa naliliivigineqarneranni atorneqartarlutik.

Tamatuma kingorna ilisimatuussutsikkut misissuisut uumasut pillugit siunnersuuteqartarput Pinngortitaleriffimmiit Naalakkersuisunut saqqummiunneqartartunik.

Suliarisartakkat, nalunaarusiat ilisimatuussutsikkullu allaaserisat

Aalisakkanut qaleruallillu immikkoortortaq suliaminut atatillugu sulianik uteqattaarneqartartunik assigiinngitsunik suliaqartarpoq. Assersuutigalugu tamakku ilaatigut tassaapput angalanermik allattuiffinnik misissueqqissaarnerit, siunnaat misissornerisigut aalisakkanik utoqqaasisersiuineq, aalisarnermit misissugassanik tigooraaneq misissueqqissaarnerlu, assagiarsuit suaaneriniit inerikkiartornerannik misissuineq, aalisarnermi kisitsisinik misissueqqissaarneq kiisalu raajaqassutsimik, assagiarsoqassutsimik, qaleraleqassutsimik, saarulleqassutsimik kiisalu qaleraleqassutsimik ukiut tamaasa misissuisarnerit. Tamatuma saniatigut immikkoortortaq ilisimatusarnikkut suliniutissanik nutaanik pilersaarusiortarpoq ingerlatsisarlunilu, nalunarusiortarluni, ataatsimiinnernit paasissutissiortarluni, ilisimatuussutsikkut allaaserisaqartarluni kiisalu siunnersuisarluni aammalu ilisimatuussusermut tunngasutigut nunat tamalaat ataatsimiinnerinut peqataasarluni.

Imaq pillugu paasissutissat ilisimatusartunit atugassat

Taamattaaq Pinngortitaleriffik imaq pillugu paasissutissanik katersuisarpoq nunat tamalaat sila pillugu ilisimatusarneranni atugassanngorlugit nunat tamalaat paasissutissaasiviinut ingerlateqqinneqartartunik. Aalisartut, uumasorsiuut, aalisarnermik aqutsisut, piniarnermik aalisarnermillu nakkutilliisut kiisalu allat attuumassuteqartut akornanni suleqatigiinneq paasissutissanillu paarlaasseqatigiittarneq pitsanngortikkumallugu immikkoortortap aalisartoqarfik tamakkerlugu attaveqatigiinnissaq immikkut pingaartitaraa.

Aalisartunik suleqateqarneq

Immikkoortortami sulisut periarfissaqaraangamik aalisartunik tikiffigisaminniittunik ataatsimeeqateqartarput aalisartut pisuussutit pillugit misilittagaannik paasisaqarfigiumallugit aammalu misissueriaatsit, paasisat, siunnersuinerit uumasunullu tunngasut pillugit oqalliseqatigiumallugit. Tamatuma saniatigut apeqqutit aalisarnermut tunngasut pillugit isumasioqatigiinnernut sulisut peqataasarput pisariaqaleraangallu ilinniartitsisarlutik.

Nunat tamalaat ilisimatuussutsikkut suleqatigineqarput

Uumasut immikkoortortap sammisartagai pillugit ilisimatusarneq siunnersuinerlu pillugit nunat tamalaat ilisimatuussutsikkut sulineranni sulisut peqataasarput. Immikkoortortaq nunat tamalaat suleqatigiiffiini makkunani sinniisuutitaqarpoq:

Ukiut tamaasa raajat misissuiffigineqartarput.