Fiskeriteknologi

Fiskeriteknologi – DTU

Fiskeriteknologi diplomingeniøritut ilinniagaq aalisakkerinermi ingeniøritut sulinermut attuumassuteqartoq – Ilinniagaavoq tamatigoortoq, tassa immami uumasoqatigiiaaniit aalisarnermut pisarineqartullu tunisassiarineqarneriniit teknologiimut kiisalu aalisakkanik qalerualinnillu piujuartitsiniartumik aqutsinissamut tunngasoq.

Tunngaviusumik immami avatangiisilerineq, imarmiunik uumassusilerineq, immamullu tunngasumik ilisimatusarneq ilanngullugu ingeniøritut tunngaviusumik pisinnaasassat (matematik il.il.) saniatigut, ilinniagaq immikkut pingasunik sammisassaqarpoq:

• Aalisarnermi teknikkikkut atortulerineq (Fangstteknologi)
• Aalisarnermik aqutsineq (Fiskeriforvaltning)
• Aalisakkerineq qalerualerinerlu (Forarbejdning af fisk og skaldyr.)

Ilinniarnermi sammisani tamani piujuartitsiniarneq eqqumaffigineqartassaaq – aammalu nutaalianik ineriartortitsineq, periarfissarsiorneq atorluaanerlu sammineqartartussaapput, taamaaliornikkut inuussutissarsiummik inerisaaneq anguniarneqartartussaammat.

Semesterit pingasut siulliit Sisimiuni DTU-p campusiani ingerlanneqassapput.

Semesterit sisamaat tallimaallu Danmarkimi DTU-mi, annertunerpaartaat Lyngby-mi, ingerlanneqassapput.

Semesterit arferngat aalisakkerivimmi, pisortat aqutsisoqarfianniluunniit misiliiffiussaaq, taannalu Danmarkimi, Kalaallit Nunaanni imal. nunami allami ingerlanneqarsinnaalluni.

Semesterit arfineq-aappaanni ilinniakkap iluani nammineq toqqakkamik Danmarkimi DTU-mi nunamiluunniit allami ilisimatusarfimmi ilinniariartoqarsinnaavoq.

Semesterit arfineq-pingajuanni ilinniakkami soraarummeerutaasumik diplomingeniøritut suliaqartoqassaaq, taannalu Danmarkimi, Kalaallit Nunaanni imal. nunami allami ingerlanneqarsinnaavoq.

Ilinniagaq naammassigaanni Kalaallit Nunaanni, Danmarkimi nunanilu allani aalisakkanik inuussutissarsiutileqarfiusuni atorfininnissamut periarfissagissaassaaq. Suliffeqarfinnittaaq imal. aalisakkerinermik aqutsivinni ilisimatusarnermilu siunnersortitut atorfininnissamut periarfissaqarpoq.

Ilinniagaq pillugu DTU-p nittartagaani annerusumik paasisaqarit uani: Fiskeriteknologi

DTU annerusumik paasisaqarfigiuk uani: Danmarks Tekniske Universitet