Kisitsisinut takussutissat aamma ilisimatuussutsikkut misissuinerit

Kalaallit Nunaanni uumasut qanoq amerlatiginerat nammineq aalajangerneqarsinnaanngilaq, tamannami aamma naammaginarpoq, tassami uumasoqatigiit amerlanerpaartaat inuunerminni piffissap ilaannaani Kalaallit Nunaata imartaaniittarmata. Piffissani allani nunat allat imartaanniittarput.

Arferit angisuut amerlassusiat IWC-mit nalilersorneqartarput

Kisitsinerit pitsaassusiat pisassiissutissanik aalajangersaannginnerni nunat tamalaat akornanni ilisimatuussutsikkut kattuffissuarnit tamatigut akuerineqaqqaartarput. Arfernut angisuunut tunngatillugu Nunat tamalaat akornanni Arfanniarneq pillugu ataatsimiititaliarsuarmi (IWC) ilisimatuussutsikkut komitemi kisitsisit eqqortumik tunngaveqarnersut aamma naatsorsuinerit eqqortuunersut isornartorsiuisumik eqqarsaatigeqqaarneqartarput. Ingammik uumasoqatigiinnik amerlanaarlugit naliliisoqannginniassammat imaluunniit uumasoqatigiit amerlassusiat ikinaarneqarsimanersut nalornissutigineqartillugu.

Aarrit arferillu mikisut amerlassusiat NAMMCO-mit nalilersorneqartarput

Taamatuttaaq aarrinut arfernullu mikisunut tunngatillugu Atlantikup Avannaani Uumasut miluumasut pillugit ataatsimiititaliarsuarmi (NAMMCO) misissuisoqartarpoq. Nalinginnaasumik kisitsinerni misiligutissanik tigooqqakkat ilumut tamakkunani sumiiffinneersuunersut taakkununnga amerliliinerunersut imaluunniit kisitseqataasut marluusut kisitatik tamarmik aappaannaataluunniit takunerai isornartorsiuisumik isummerfigineqartarput. Uumasoqatigiit inaarutaasumik akueralugit amerlassulerneqarnissaat ukiuni arlalinni pisinnaasarpoq, pisunilu ataasiakkaani isornartorsiuinerit akuersaarneqanngitsoorsinnaaneq ajorput.