Timmissanik nalunaaqutsersuisarnerit

Timmissat nalunaaqutserneqartarneri imaluunniit qaammataasanut nassitsissutilerneqartarnerat peqqutaallutik timmissat ingerlaartarfii aammalu timmiaqatigiiaanut arlalissuarnut tunngassuteqartut paasissutissat pingaaruteqartut, assersuutigiinnarlu sumik toqquteqarsimanerannik, ukioqatigiiaat katitigaanerinut tunngassuteqartut allarpassuillumi paasineqartarput. Paasissutissat taama ittut taamaallaat pissarsiarineqarsinnaasarput nunarput tamakkerlugu innuttaasut eqeersimaarlutik suleqataanerisigut. Timmissat nalunaaqutallit nassaarineqartartut amerlasuut nunani allani nalunaaqutsigaasarsimapput.

Timmiaq nalunaarutigeqqiguk

Timmissamik nalunaaqutalimmik pisaqarsimaguit takusimaguilluunniit, tamanna Pinngortitaleriffimmut nalunaarutigiuk.

Nalunaarutiginninniarnermi immersugassaq ugguuna aasinnaavat

Nalunaaqutaq pissarsiarerusunneruarput timmissap isigaa ilanngullugu, panertillugu imaluunniit isigak nalunaaqutalik asiunnginniassammat pappiaqqamik poorneqarsinnaavoq.

Paasissutissat uku ilanngullugit Pinngortitaleriffimmut nassiutiguk:

1. Nalunaaquttap normua allaqqasoqarpallu ilanngullugu
2. Timmiaq sorleq – sorliunera nalunngisaq imaluunniit ilimagisaq
3. Ulloq pisarinerani/nassaarineraniluunniit qassinngornera
4. Sumiiffik – pisaqarfik/takunniffik – aammalu illoqarfik qaninnerpaaq nunallu immikkoortuata taajutaa
5. Timmissap qanoq innera: uumava, toqungava (toqoqqammersoq imaluunniit qangalili toqungasimasoq), nassaarineqarnermini napparsimarpasippa imaluunniit arlaanik ajoqusersimava il.il.
6. Nassaarinerani pissutsit: Aallaasaava, umiarsuarmut, igalaamut imaluunniit innaallagissat aqqussuinut aportuua, nappaateqarnera ajoqusersimaneraluunniit peqqutaalluni toquttariaqarsimaviuk imaluunniit iperaannartariaqarsimaviuk, nalunaaqutaata normua qinngutikkut imaluunniit assiliivitsigut takusinnaasimaviuk, nalunaaqutaannaq nassaariviuk il.il.
7. Nassaartup atia, attaviginiarnerani paasissutissat aamma kontonormu, uterfigeqqissinnaaniassagatsigu nalunaaquttamut tunngassuteqartunik akissarsiassaqarpallu tunisinnaaniassagatsigu.

Timmiaq saviminermik nalunaaqutsigaasimappat, normua allassimasullu erseqqilluarsimappata paasissutissat uunga mailerutigineqaannarsinnaapput: info@natur.gl
Taamaaliorneq akissarsissutaaneq ajorpoq.

Sianerit imaluunniit allagit uunga:

Pinngortitaleriffik
Kivioq 2, Postboks 570
3900 Nuuk, Grønland
Oqarasuuat: 36 12 00

Nalunaarsuerujussuarnerit

Kalaallit Nunaanni timmissat 280.000-nit ikinnerunngitsut timmiaqatigiinnit assigiinngitsunit 53-iusunit saviminernik ammalortunik Zoologisk Museum-imeersunik nalunaaqutsiisoqartarsimavoq. Kalaallit Nunaatalu sineriaa tamakkerlugu inuit 300-nit amerlanerusut nalunaaqutsersueqataasarsimapput.

Taama annertutigisumik suliniuteqarneranik timmissat 15.500-t nalunaaqutserneqarsimasut naneqqinneqarsimapput, taamaalilluni paasineqarluni timmiaqatigiit assigiinngitsut 43-t nalunaaqutserneqarsimasut. Nunatta avataani nalunaaqutsersuisarnerit timmiaqatigiinnik assigiinngitsunik 14-inik allattorsimaffimmi ilatitsisimapput.

Nalunaaruteqaqqittarnerit amerlanerpaartaat peqquteqarput sorsunnersuup aappaaniit 1980 tikillugu timmissanik amerlasoorpassuarnik nalunaarsuisoqarsimammat. Taamaalilluni manna tikillugu timmissat nalunaaqutaannik katersorneqartartunit 10-t 50-illu akornanni nunatta avataani nalunaaqutserneqartarsimasut nalunaarutigeqqinneqartarput.

Kalaallit Nunaanni timmissat niuisigut nalunaaqutserniarneqaleraangamik nalunaaqutassaa Danmarkimi Københavnimiittumi Zoologisk Museum-imit pissarsiarineqartarpoq. Aamma nalunaaqutsiiniarnerneq Namminersorlutik Oqartussat nalunaarutaat nr. 17, 28.oktober 2019-imeersoq timmissat illersugaanerannut piniagaanerannullu tunngassuteqartoq naapertorlugu Aalisarnermut, Pinianermut Nunalerinermullu Naalakkersuisoqarfimmit akuersissummik §26 naapertorlugu peqqaartoqartariaqarpoq.

Timmissanik nalunaaqutsersueriaatsit nutaat

Timmissanik nalunaaqutsersueriaatsit nutaat arlalissuit ukiuni kingullerni 20-ni takkussuussimapput. Eqqaaneqarsinnaasut makkuupput, qalipallugit nalunaaqutserneqartarnerat, niuagut saviminermik kode-likkamik ikkussilluni nalunaaqutsiineq, taamaattut qinngusersaarnikkut imaluunniit assiliivik atorlugu kode-taat takuneqarsinnaapput, taamaalilluni pisarineqanngikkaluarlutik sumiinnerat nalunaarutigineqarsinnaalerluni, qaammataasanut nassitsissutit aammalu paasissutissanik katersuutit datalogger-inik taaneqartartut. Nassitsissutilersueriaatsit timmiaqatigiinnik aalajangersimasunik suliniuteqarnermi atorneqartarput. Tamakku nalunaaqutsersueriaatsit nutaat niuisigut saviminernik nalunaaqutsiisarnernit akisunerusarput. Periutsinilli nutaaliaanerusunik atuilluni nalunaaqutsikkanit paasissutissanik sukumiinerusunik amerlanernillu piffissami sivikinnerusup iluani pissarsiviusarpoq.

Dataloggerit – lyslogger-it pillugit uani atuagaqarsinnaavutit.