Avatangiisinut Aatsitassanullu

Avatangiisinut Aatsitassanullu Immikkoortortaqarfimmi atorfeqarput biologit ingeniørillu ilisimatusaatigalugu avatangiisinut tunngasunik ilisimasalinnik, ingeniørinillu siunnersuinermik ilisimasaqartunik sulisoqartoq. Immikkoortortaqarfimmi akuutissanut avatangiisinut tunngasunut ilisimasaqarluartuupput, avatangiisinilu tappiorannartunik ilisimasaqartunik, aammalu aatsitassarsiortoqartillugu uuliasiortoqartilluguluunniit, nunap iluanik mingutitsinermut tunngasunut ilinniartitsinermillu ilisimasaqartunik sulisoqarpoq. .

Pinngortitaleriffiup Avatangiisinut Aatsitassanullu immikkoortua upernaami 2014-imi pilersinneqarpoq. Aatsitassaqarneq Kalaallit Nunaata akisussaaffigilermagu, nunatsinniillu aatsitassaqarneq pillugu avatangiisinut tunngasut sunniuteqartussat pillugit siunnersuisinnaarusummata, immikkoortortaq pilersinneqarpoq. Immikkoortortaq tamanut iluaqutissatut aningaasaliisarfimmit Oak Foundation-imit Schweizimi allaffeqarfeqartumit aamma Danmarkimiittumit VILLUM Fonden-imit taperserneqarluni pilersinneqarpoq

Kalaallit Nunaanni nunap ataanik atorluaanissamut atatillugu issittumi avatangiisit illersorneqarnissaat pillugit tamatigoortumik Namminersornerullutik Oqartussanut siunnersuinissaq immikkoortortap anguniagaraa. Tamanna siunnersuineq misissuinermik, nakkutilliinermik allanillu siunnersuisarfinnik ilisimatusarfinnillu suleqateqarnermik tunngaveqarpoq. Siunnersuisarnerup siunertarai, pinngortitatigut ineriartorneq pitsaasoq, inuiaat nerisartagaat qulakkeernissaat, taavalu nunap aatsitassaatai sumiissusersiniarlugit akisussaassusilimmillu piujuartitsinissarlu siunertaralugu atorneqarnissaat.

Aatsitassarsiorfiusimasuni pinngortitap naasoqaleqqinnera dronet atorlugit misissuiffigineqarput. Uani gultisiorfimmi Nalunami aqqusineq qanoq naaffigineqartiginersoq assilisatigut uppernarsarlugu misissuiffigineqarpoq.  (Assi: Morten Birch Larsen)