Illu
Maajip 28-ani 1996-imi Naalakkersuisuni ilaasortap Marianne Jensenip Pinngortitaleriffiliorfissami qaartitseqqaartuuvoq, illulu februarip 14-iani 1998-imi atoqqaarfissiorneqarpoq.
Aage V. Jensens Fonde ukiorpassuit ingerlaneranni Kalaallit Nunaat ilanngullugu pinngortitamik paarsilluarnissaq pillugu suliarpassuarnik tapersersuiuarsimavoq. Nunatsinnilu Namminersornerullutik Oqartussat pinngortitamik ilisimatusarneq pillugu sullissivimmik pilersitsiniarlutik aalajangermata Aage V. Jensen Fonde 35 mio. kr. missaanik aningaasaliivoq suliffeqarfik sananeqarniassammat.Majip 28-ani 1996-imi Naalakkersuisuni ilaasortap Marianne Jensenip Pinngortitaleriffiliorfissami qaartitseqqaartuuvoq, illulu februarip 14-iani 1998-imi atoqqaarfissiorneqarpoq.
KHR Arkitekter-p illup 2.000km2-ip missaanik angitigisoq ilusilerpaat. Allerpaami laboratoriaqarpoq, qerititsiviit, garage aamma sullivik. Akullermiipput ilisimatusartunut allaffeqarfimmullu allaffiit, ataatsimiittarfiit, qiteqquttarfik saaffiginnittarfillu, qullermiippullu pisortap allaffia, attaveqatigiinnermik immikkoortoqarfik ilisimatuussutsikkullu atuagaasivik.
Eqqumiitsuliortup Aka Høeghip nerisarfiup iigaata betonitaa pinnersagaraa.
Illup ilusilerneqarnera
Illu sumiiffigineqartoq tunngavigalugu tulluarsakkamik inissinneqarlunilu ilusilersorneqarsimavoq. Illumik titartaasartut aalajangersimavaat marlunnik napasuliiniarlutik qupparnertaatigullu atatilerlugit, illup iluaniit takungaanni sermimut iigartartumut eqqaanarluni, illoriinnik portusuunik iigarsuaqarluni. Napasut kujammut tungaani imminnut ungasilliartuaarput, quppallu isua igalaamik ilassutitaqarpoq. Kujataata tungaanut amiliartornerata seqerngup qinngornera itinerusumik isertissinnaalerpaa. Qalia qeqqatigut portunerulaarpoq, qaamanerlu kitaanit kangianeersorlu qaliani alumiiniunit siaangasunit siammarterneqartarpoq.
Quppaata illup quleriivini qeqqaniittoq minnerusuusitippaa, quppalli iluatungaaniit takungaanni pikkunartumik itinerusuusititsivoq. Quppallu silinnerpaaffiani kujammut isikkivik kusanarluinnarpoq.
Illu avannaaniit kujammut sammiveqarpoq, puisitullusooq anori avannaani kangianinngaanniikkajunnerusoq tunullugu taleqquni qaqqap saava tungaanut inissillugit ittuusivoq. Illu takkajaajulluni ingalaarujussuaqarami illup inaani seqineqarluartitsisarlunilu isikkivigeqaaq.
Illummi allaffiit iikkanik portusuunit akunneqarput, sermersuarmi quppanut eqqaanartumik akunnera isikkoqarluni.
Illup aaqqissuunneqarnera
Illu marlunnik isertarfeqarpoq: isertarfik pingaarneq taavalu sullivinnut laboratorianullu isertarfik. Isertarfik pingaarnikkut iseraanni saaffiginnittarfeqarpoq, atisaasivik pulaartunullu perusuersartarfiit. Tassanngaanniit illup saarlianut isertoqassaaq, qiteqquttarfik ataatsimiittarfiillu tassani inissisimallutik. Isertarfimmiillu illup qaliariivinut allermut qullermullu tummeraqarlunilu elevatoreqarpoq. Illup qaliariiani qullermi pisortap allaffia, attaveqatigiinnermut immikkoortoqarfik atuagaasivillu inissisimapput, qaliariinnilu allermi saqqummersitsiveqarpoq inimut qeqqaniittumut atasumik. Allaffiit sinneri iingarsuarni atatitsini qaliariinni akullermi inissisimapput. Illup sullissivittaqarfia qaliariinni allermi illup tunua tungaani inissisimavoq. Garage quilu immikkoortiterivimmut, sullissivinnit, laboratorianit, qerititsiveqarfinnit, atortuusivimmit sulisullu atisaajartarfianit ilitsivittut atorneqartumut, atapput.
Sannaa atortullu toqqarneqarnerat
Pisariunngissuseq illup sananeqarnerani atortunillu toqqaanermi ilisarnaataavoq. Periarfissaatillugu atortussat nunatsinneersut ilisimaneqarluartut atungaalluareersullu toqqarneqarsimapput.
Illumik atatitsisut (nateq aamma sinaatigut iigartai) betonngimik plastimut kuisamik sanaajupput, betonngilu nunatsinneersunik akungaalluni. Iigartai silarliit kiffiutitaqarput orpimmiillu thujamit qisummit qalligaallutik. Qisuk piffissap sivikitsup iluani sølvitut qalipaateqalertarpoq, paneraangami qaamasarluni masatseraangamilu taarsisarluni. Qisuk suliareqqitaanngilaq, annertuumik harpiksitaqarnerata pingeriigaanik sitsiaallisaagami. Napasuliat qaliaat qernertumik qalissialigaavoq, portunerusortaili quppamiittut alumiiniumik qalligaapput. Qaliatalu uinganerata imeq qalianiittoq kuutsittarpaa.
Ilorlianilu atortunik pisariunngitsunik toqqaasoqarsimavoq, tamannalu aserfallatsaaliuinermi eqqiaanermilu oqilisaataavoq. Torsuusat illisaasalianik natiligaapput, betonngimillu suliareqqitaanngittumik iigaqarlutik. Allaffiit, ataatsimiittarfiit atuagaateqarfillu qisussianik natiligaapput gipsinillu qaqortumik qalipannikkunik iigaqarlutik.
Inini allerni tappiorarnartunik misissuiffiit ipput.
Avatangiisinik mianerinninneq
Innaallagissamik imermillu atuineq annikitsinniarlugu, piujuartitsinissarlu siunertaralugu atortunik toqqaaneq iseruminassuserlu eqqarsaatigalugit illu ilusilerneqarsimavoq. Illu anorlernikkaami inissisimammat anorip malillugu sammivilerneqarpoq, taamaalilluni anorip sunniutaa annikillisillugu. Igalaallu ilusaasa ullup qaammarnga ininut isertilluartarpaat, tassuunatigullu qaammaqquserniarnermi innaallagissamik sipaartitsilluni. Illup sannaata, napatitsisut oqimaattut, oqitsunik qisunnik qalleqqanera kujammullu sammisumik igalaaqarnerata seqerngup kissarnera atorluarsinnaanngortippaa.
Illup qisunnik qalleqqanerata seqerngup qaammarnga akimmitsillugu ininut ingerlatittarpaa, iluanilu betonngit seqerngup kissarnera tigoorartarlugu. Illullu isuaniittut igalaarsuit qaamarnermik isertitsilluartussatut nillermillu isaatitsisussaanngitsutut sanaajupput, seqerngullu kissarnera igalaamit kujammut sammisumit isertoq natermit iikkaniillu tigooraatitsissalluni. Quppaqartillugu sananeqarsimanerata qalianilu qeqqatigut portunerunerata sapinngisamik seqinermik kissarnermillu illumut isertoqarsinnaatilluarpaa.
Seqerngup kissarnera quppaqarfiup nalaani silaannarmik kaaviaartitsilersivoq, taamaalilluni allaffinnik tassani inissisimasunik atortulertariaanngitsumik silaannarissaatsitsisarluni. Ataatsimiittarfissuaq, qiteqquttarfik atuagaateqarfillu portusuunik qaliaqarput, taamaalilluni innaallagissatortumik silaannarissaaserneqartariaqaratik. Init taakkua allaffittuulli silaannarissartarput.
Eqqumiitsuliortoq kalaaleq ilisimaneqarluartoq, Aka Høegh, qiteqquttarfimmi kusassaasimavoq. Qiteqquttarfiup iigarsui betonngiusut qiperuiffigalugit ilusilersuiffigisimavai. Torsuusallu qalipaasersorneqarnera eqqumiitsuliortup Niels Guttormsenip isumagisimavaa.
Ilanngullugulu nunarsuami uillut anginersaat, Pinngortitaleriffiup ammaanersiorneqarnerani Aage V. Jensen Fondemit tunniunneqarsimasoq, takuneqarsinnaavoq.
