Pinngortitaleriffiup allissutaa atoqqaartinneqartoq

Aage V. Jensen Charity Foundation-imi siulersuisunut siulittaasoq, eqqartuussissuserisoq Mette Skov aamma pisortaq Klaus Nygaard. Ass: Lars Maltha Rasmussen

Aage V. Jensen Charity Foundationimi siulersuisut siulittaasuat, eqqartuussissuserisoq Mette Skov, qaaqqusat 100-t missaanniittut ilassineqarneranni Pinngoritaleriffiup allissutaanik tunniussisuuvoq. Mette Skovip oqalugiarnermini Namminersornerullutik Oqartussanik, maannakkut Namminersorlutik Oqartussanik, Aningaasaateqarfiit 1980-ikkunniilli tapiissuteqartarneranni ukiorpassuarni pitsaasumik suleqatigiittarsimanerit erseqqissaatigai. Aningaasaateqarfiit pilersaarusiarpassuarnut, atuakkanik saqqummersitsinernut, suliat tikillugit suliaqarnerni atortorissaarutinut, angallannermi atortunut tunissutinilu annerpaami Pinngortitaleriffiliornermut, Pinngortitaleriffimmi unnuisarfimmut maannakkullu Pinngortitaleriffiup ilassutaanut tapiissuteqartarsimapput. Mette Skovip taamatut iliorluni Kalaallit Nunaanni sukkasoorujussuarmik ineriartornermut aamma pinngortitamik pisuussutaatilimmik qulakkeerinnissamik suliaqarnermut peqataasimaneq ilisimannittuunerlu qujassuteqarfigai.

Ilisimatusartut, piniartut aalisartullu akornanni suleqatigiinneq tamatuminngalu nukittorsaaneq Naalakkersuisup Anthon Frederiksenip Namminersorlutik Oqartussat illorsuup ilassutaanik tigusisut sinnerlugit qujassuteqarluni oqalugiarnermini sammisaasa pingaarnersaraat. Namminersorlutik Oqartussat pinngortitamik tamatigoortumik qulakkeerinnissamik kissaateqarnerat  Anthon Frederiksenip erseqqissaatigaa aammalu Pinngortitaleriffiliornermi Aage V. Jensenip Aningaasaateqarfiisa tapiissuteqarsimanerat tunngavissiisuusimasoq pingaartutut oqaatigalugu. Tamanna inuiaqatigiit tulluusimaarutigigaat ilisimatuussutsikkullu pisuussutinik uumassusilinnik aqutsinermut tunngavissiissutut aamma oqaatigaa. ”Tamanna tunngavigalugu nunatsinni pinngortitami piujuartitsinermik tunngaveqarluta atuisinnaanerput qulakkeerneqarpoq aamma uumasoqatigiit assigiinngitsut ikiliartorunnaarlutik amerliartulersimaput””, Anthon Frederiksen oqarpoq.

Pisortaq Klaus Nygaard aqutsisoqatigiit sinnerlugit oqalugiarami illuutini atortorissaarutit pitsaasut aamma pitsaasumik ataqatigiissaarineq sukkasuumik ineriartornermut qanoq aalajangiisuutigisut oqaatigaa. Klaus Nygaard Aage V. Jensenip Aningaasaateqarfiisa takorluuilluartumik ataavartumillu suleqataanerat qujassuteqarfigaa aammalu suliassamik suliarinnittut (entreprenørit), assassornermik suliaqartut siunnersortillu illorsuullu allissutaanik kusanartumik kinguneqartumik suleqatigiilluarsimanerat pillugit qujassuteqarfigai.

Pinngortitaleriffiup ilassutaa talerperliulluni atsinnerulaarpoq.

Pinngortitaleriffiup allissutaa 820 kvm2-it missaanni annertussuseqartoq sulisunut 25-nut allaffeqarpoq, ataatsimiittarfeqarpoq, laboratoriaqarpoq, inaalitsiveqarpoq, naqqup iluani sikkiliisiveqarpoq aneerasaartarfimmullu atasumik issiaartarfeqarluni. Pinngortitaleriffiup allissutaani atortussanik pitsaassutsinillu toqqaanermi illorsuartaviani tamakkuninnga atortut assigannik toqqaasoqarpoq.  Aage V. Jensenip Aningaasaateqarfiinit 33 mio. koruunit missaanniittunik tunissuteqartoqarneratigut illorsuup allissutaa sananeqarpoq. Tunissutinut ilaatinneqartut aamma tassaapput pequtit, qerititsiviit nutaat, ataatsimeersuarnernut atortut aamma illorsuarmeereersunik allanngortiterinerit.