R/V “Tarajoq”
”Tarajoq” Kalaallit Nunaata ilisimatuussutsikkut umiarsuartaaraa, nunatta imartaanik pisuussutaanillu misissuisartussaq. Namminersorlutik Oqartussat aatsaat taamak ilisimatusarnernut aningaasaliissuteqartigipput, 235 millioner koruuninik akilimmik Aage V. Jensens Fonde-t tapiisoralugit aningaasaliissuteqaramik. Taratsup taarserpaa ilisimatusarnermut umiarsuaq ”Pâmiut”. Skipsteknisk AS, Norgemeersut titartaasuupput, umiarsualiorfiullu BALENCIAGA-p Spaniami sanaaralugu.
Tarajoq 61 meterinik angissusilik, sikusiuteqarami issittup imartaanut piukkussakkatut sanaajusoq, ukiorpassuarnilu Avataani misissuinerni atorneqartuartartussaavoq. Tarajoq angillunilu atortorissaarami avannarparterluarsinnaassaaq ilisimatusarnernut avatangiisinullu tunngasunik assigiinngitsorpassuarnik suliaqarsinnaasassalluni. Tarajoq innuttanik aqqaneq-marlunnik inissaqartitsivoq ilisimatusartartullu 20-t saniatigullu Imarsiornermik Ilinniarfimmiit ilinniartunik ilaasoqarsinnaassalluni.
Tarajoq sumiissusersiutinik attaveqaatinillu atortugissaaqigami, kivittissutaasinnaasullu assigiinngitsut pigigamigit issittumi ilisimatuussutsikkut sunilluunniit suliaqarsinnaavoq. Nunatta imartaa sukumiisumik assiliorsinnaavaa multibeam atortorissaarutigalugu, immap tarajoqassusia, kissassusia, qaavaniillu naqqa tikillugu misissugassanik tigooraaffigisassallugu.
Tarajoq inuit immamut taaguutitoqaraat. Tarajoq Kalaallit oqariaasitoqaasa ilagaat: okalûsai tarajuligssugput, tassa kimittuumik oqaluttoqartillugu atorneqartarsimalluni.
RV Tarajoq Namminersorlutik Oqartussat sinnerlugit Pinngortitaleriffimmik ingerlanneqarpoq.
Kisitsit pingaarnerit
| Bruttotonnage | 2.841 |
| Nettotonnage | 852 |
| Takissuseq | 61,4 m |
| Silissuseq | 16,0 m |
| Itsinera | 6,4 m |
| Sukkas. nalingin. | 14 knob |
| Kalissinn. | >50 tons |
| Imma. uninnga. | >40 |
Foto: Pinngortitaleriffik.
Taratsup titartarneqarnera.
