Timmissat toqungasut Qaanaami naammattoorneqallattaasut Saqqummersinneqarfia 30.09.2024

Timmissat toqusimasut naammattooraanni pisortanik isumaqatigiissuteqareernikkut aatsaat passunneqartarnissaat erseqqissaatigissavarput.

Pinngortitaleriffik sapaatip akunnerata siuliata ingerlanerani timmissanik toqusimasunik naammattuuisoqarsimasunit, ingammik taateraanik, Qaanaap eqqaani toqusimasunik kalerrinneqallattaavoq.  Kalaallit Nunaanni Uumasunut Nakorsaqarfik Inuussutissalerinermullu Oqartussaqarfik (UNIO) suleqatigalugu timmissat suna nappaatigineraat paasiniarniassagatsigu, timmissanik misissugassanik katersisoqarnissaa aallartisarneqarpoq.

Nunatsinni timmissat nualluutaat toqussutaasartoq (Aviær influenza) siornatigut atuussimasoq uppernarsarneqareerpoq, timmissallu toqusimasut timmissat nualluutaannik toqquteqarsimanissaat pasitsaanneqarpoq. Tamannali suli uppernarsarneqarani.

Ukioq manna siusinnerusukkut Ittoqqortoormiit eqqaanni appaliarsuit assingusumik toqorarnerannut tunngatillugu UNIOmiit nalunaarutigisimasaq uani atuarneqarsinnaavoq: https://llk.dk/xb86sw