Nunatta kujataani appat toquinnarsimasut ukioq perlerlutik toqusimapput Saqqummersinneqarfia 17.05.2018
Nunatta kujaterpiaani ukiortaarsimalaaginnartoq 2018 appanik toquinnarsimasunik tusarsaasoqalerpoq, taakkulu perlerlutik toqusimasut paasineqarpoq. Tamanna Danmarkimi inuussutissalerinermik ilisimatusafiup DTU Veterinærinstituttip, Danmarks Tekniske Universitetip ataaniittup, Pinngortitaleriffiullu misissuinerannit erserpoq.
Piniartut appanik toquinnarsimasunik sumiiffinnit assigiinngitsuniit ilisimatusarfeqarfinnit pineqartunit katersitinneqarput, taamaalillunilu appat katillugit 20-t misissuiffigineqarlutik. Appat misissorneqartut suluttuararsuupput, ukiumilu oqimaassuserikkajutaminnit 40 %-imik oqinneralutik. Appat misissorneqartut ilaat pingasut timmissat nualluutaannik nappaateqartut paasineqarpoq, kisiannili taanna sakkortuumik tuniluuttuunngilaq. Timmissat nualluutaat nassaarineqartoq timmissani nujuartani nalinnginnaasumik timimiorineqartarsimavoq, taamaammallu timmissanik perulutsitsisarani, Uumasut nakorsaanerunerat Sanne Eline Wennerberg, nunatsinni Uumasunut Nakorsaqarfik Inuussutissalerinermullu Oqartussaaffimmeersoq.
Appanik toquinnarsimasunik siumuisimasut siulliit tutsiuttut 3. januar 2018-imeerput qavannga Aappilattumiit Narsaq Kujallermiillu nalunaaruteqartoqarmat, sapaatillu akunnerini tulliini Paamiuni Nuummilu aamma appanik toquinnarsimasunik siumuisoqartarsimalluni.
Nunatta kujataani appat toquinnartartut sionatigut aamma naammattoorneqartarsimapput, tassa 2004-mi 2014-imilu. Taakkunani pisuni marlunni misissuisarsimanerit takutippaat appat perlerlutik aamma toqusarsimasut. Imaassorinalerpoq appat ukiisarfimminni silapiluttarneranik aamma/imaluunniit nerisassaalatsinerminnik peqquteqartumik akuttunngitsunik toqorartarsimassasut, Pinngortitaleriffimmi Seniorforsker Flemming Ravn Merkel nassuiaavoq.
Nunatta kitaani kujataata avataa appat Svalbardimeersut, Islandimeersut aammalu nunatsinneersut ukiisarfigaat, nunallu aggerfigisaat tamarmik apppanik piaqqisaartoqassutsimikkut annertuumik kinguariaaateqarsimapput.
”Appaqarfinni taasatsinni appat ikiliartupiloornerat ukiisarfimminni ilaatigooriarluni toquinnartartorpassuarnit qanoq sunnersimatigineqarnerat ilisimasaqarfiginngilarput, taamaattarnerallu appaqassutsimut soorunalimi ikiliartuutaaqataavoq”, Flemming Ravn Merkel nassuiaavoq, nangillunilu:
”Paasisarput alla tassaavoq appat toquinnartartut amerlanerusut arnaviaasarmata, tamannalu appaqassutsip kinguariartupiloorneranut suli ajornerusumik kinguneqarsinnaavoq”.
Nunatsinni Uumasunut Nakorsaqarfik Inuussutissalerinermullu Oqartussaqarfimmiit Pinngortitaleriffimmiillu timmissanik toquinnarsimasunik naammattuuisoqarnerani piaartumik ilisimatitsisoqartarnissaa kissaatigineqarpoq. Ilanngullugu ilisimatitsissutigineqarpoq timmissat toquinnarsimasut passutilinniginnerini Uumasunik Nakorsaqarfik attavigineqaqqaartassasoq.
Itinerusumik paasisaqarusunnermi saaffigisassat:
Seniorforsker i Pinngortitaleriffik Flemming Ravn Merkel oqarasuaat: +45 30783173 imal. email: frm@bios.au.dk
Imaluunniit:
Kalaallit Nunaanni Uumasunut Nakorsaqarfik Inuussutissalerinermullu Oqartussaqarfik oqarasuaat 345000 imal. email: uumasut@nanoq.gl
