Qeqertarsuup Tunuani nipit Saqqummersinneqarfia 19.04.2024

Immami nipit Qeqertarsuup Tunuaneersut tusarnaarneqarsinnaanngorput – imaani pisut tusarnaakkit!

Imaq Qeqertarsuup eqqaaniittoq niperpassuaqartarpoq. Ilulissat qanngorpallannerat, umiarsuit ingerlaarnerat, aammalumi arferit puisillu imminnut attaveqarfiginiarlutik, sorlumminnik nipilior-titsinerat, uinngilanerat, nipiliornerallu tusaaneqarsinnaagamik. Massakkoqqissaarlu arfiviit qimagutinnginnerminni erinnersaarneri kingulliit maajip ingerlanerani tusaaneqarsinnaapput. Ussuit angutiviat uinngialanerat immaqaluunniit qilalukkat qaqortat qernertalluunniit avannamukaarlutik qimagutitsinnatik nipiliorneri iluatsitsilluassagaanni tusaaneqarsinnaasussaapput. Juunimi qipoqqaat, tikaagulliusaat tikaagulliillu takkuppata taakkua imaani tusaaneqarsinnaanngortussaassapput.

Qeqertarsuarmi Qaqqaliami nipinik siammarterussutaasoq tusarnaarneqarsinnaalerpoq ugguuna www.diskolive.com. Nipinik siammarteriffiup immami mikrofonimik attavilerneqarsimaneratigut Qeqertarsuup Tunuani immami nipit ukioq kaajallallugu ulloq unnuarlu siammartertuartussaavai. Nipit siammerterneqaannaratik aamma toqqortorneqartussaassapput, ukiut ingerlanerini imaani miluumasut nipaasa allannguuteqarnerat inuillu pilersitaannik nipiliornerit qanoq annertutigilersimanerat takussutissaqarsinnaaniassammata.

Qeqertarsuup Tunua nunatta kitaaniittoq issittumi immikkuullarissuseqarpoq uumasut assigiinngiiaartorpassuit tamaani uumasaramik. Tassa issittup uumasui atlantikullu imartaata uumasui piffis-sani assigiinngiiaartuni tamaani uumasaramik. Assersuutigalugu arfiviit pingaaruteqarluinnartumik Qeqertarsuup Tunua katersuuffigisarpaat. Arfiviimmi 500it 1.000illu akornganni amerlassuseqartut januaarimiit juunimut ukiut tamaviisa tamaani uumasaramik.

Suliniut nipinik siammarterinissamut tunngasoq Qeqertarsuup illoqarfia, Arktisk Stationi, naalagaaf-fimmi Statens Naturhistoriske Museum, Visit Greenland aammalu Pinngortitaleriffik suleqatigiinne-risugut piviusunngorsinnaasimavoq. Kronprins Frederik-up aammalu Kronprincesse Mary’p aningaa-saateqarniannit, Carlsberg Foundationimit, Aage V. Jensenip Charity foundationimik aammalu Hotel Disko Islandimit suliniut aningaasaliiffigineqarsimavoq.

Sukumiinerusumik paasisaqarniaraanni attavigisassaq:

Miluumasunut Timmissanullu Immikkoortortaqarfimmi ilisimatusartuuneq Outi Tervo, outi@ghsdk.dk