Saarulliit sinerissap qanittuaniittut Nunattalu Kangianeersut suli ikileriaqqipput Saqqummersinneqarfia 13.06.2019
ICES-imiit siunnersuutigineqarpoq, saarullit Nunatta Kangianeersut 2020-imi pisarineqartussat 3.409 tonsinik amerlanerussanngitsut, tassa siorna siunnersuutigineqartunit 2.000 tonsinik ikinnerussasut innersuussutigaat. Pisassiissutitut innersuussutigineqartut ikileriarnissaat ilimagineqareersimavoq, saarulliit suffisartut 2004-miilli ikiliartuinnavissimammata, 2003miillu amerlerujussuarnerisa kingornali saarullinnik pisassiissutinngortussanik nutaanik takkuttoqarnikuunngimmat.
ICES-imiit aamma siunnersuutigineqarpoq, Kalaallit Nunaata Kitaani sinerissap qanittuniani pisarineqarsinnaasussat 5.537 tonsit qaangissanngikkaat, tassa siorna siunnersuutigineqartunit 1.200 tonsinik ikinnerussasut innersuussutaavoq. Matumani ikileriartoqarnissaa aamma naatsorsuutigineqareerpoq, tassami 2015-imiilli sinerissap qanittuani saarulleqassuseq appariarsimammat, taassumalu saniatigut saarulleeqqat pisarineqarsinnaasunngortussat (1-imik ukiullit) ikittunnguummata.
Saarulliit sinerissap qanittuaniittut kitaatalu avataaneersut ataatsimoorneranni, sinerissap qanittuani saarullinniarneq pisarpoq. Taamaattumik-una kangerlunni pisarineqartut 10.000 tonsit missaaniittartut, sinerissap qanittuaneersut 5.000 tonsit qaavisigut kitaani avataaneersut aamma taamak amerlatigisut pisassiissutigineqartaramik. Pinngortitaleriffiup naliliinera malillugu sinerissap qanittuani saarullittassat 5.537 tonsit naligissavaat saarullittassat katillugit 11.000 tonsit. Taakkualu 2019-imi pisassiissutissatut innersuussutigineqartunut 14.500 tonsinut naapertuupput.
ICES-imiit siunnersuutaavoq Nunatta Kitaata avataani suli saarullinniartoqassanngikkallartoq. Tamannalu sinerissap qanittuani saarullittassanut ajornartorsiortitsisinnaagaluarpoq, tassami sinerissap qanittuani pisarineqartussat affaasa missaat avataaneersuummata.
Annerusumik paasisaqarniaraanni:
Annerusumik paasisaqarniaraanni attavigineqarsinnaavoq Helle Siegstad Aalisakkanut Qalerualinnullu immikkoortortaqarfimmi pisortaq oqarasuaat 36 12 00-mut sianernikkut imaluunniit mailerfigineratigut uunga helle@natur.gl
