Olav ilisimatusarnermut ikiuisoq Saqqummersinneqarfia 26.07.2024
Olav Mikaelsen’ip 16inik ukiullip Tasiilami Siu Tsiu suleqatigai. Maannakkullu ilisimatusartup postdoc’illu Narissa Bax-ip Siu Tsiu isumaqatigiissusiorfigereerpaa inuusuttut Tasiilameersut sapaatip akunnera ataaseq Pinngortitaleriffimmukartarsinnaanngortillugit. Taamaasilluni Olav Mikaelsen siullersaalluni Nuummiippoq ilisimatusartullu illoqarfimmi suleqatigalugit. Postdoc Narissa Bax immami qeqquaqarfissuit qanoq atsigisumik silaannarsuarmiit CO2mik iijoraatigisarnersut uppernarsiniarlugu suliaqarpoq– misissuinerlu ilaatigut Tasiilap eqqaani ingerlanneqartussaavoq.
Olav oqaluttuarpoq, Pinngortitaleriffimmut Nuummiittumut sapaatip akunnera suliartornini pissanganartillugu.
-Pinngortitaleriffimmi ulloq siulleq qeqqussat maajimili panersarneqalersimasut kaattamik sequtserpagut, sequminnertaat misissorneqarsinnaaniassammata.
Ullormili suliffimmini siullermi illup iluaniinnaq sulisinneqanngilaq.
-Qeqqussat sequtsereeratsigit taava Nuutoqqamut, Sassuma Arnaata eqqaassutissaata eqqaani sissamut qeqqussanik misissugassanik katersiartorpugut.
Kangerluarsunnguaq siumut/utimut
Olav Mikaelsenip Kangerluarsunnguanukaqataanissani angumeraa aqagukkut toqqusaarlussualertigani.
-marlunngornikkut aalisakkat nerisartagaannik misissorneqarniassammata katersiartorpugut, soorlutaaq immami qanoq co2-qartiginersoq misissorlutigu.
Olav’i naak nuffasersimagami uninngasariaqarsimagaluarluni, ilisimatussutsip silarsuaanut soqutiginninnerulersimavoq. Silap allanngoriartorneranut tunngasut meeqqat atuarfianniinnermini sammisimaqai allaallu taamani TVkut apersorneqasimalluni. Sunngorniarnerlunilu nalunngereerpaa.
-ilinniartitsisunngorusuppunga, matematik, tuluttut qallunaatullu sammissallugit nuannarisarigakkit.
Siiunissamili avatangiisinut tunngasunik silallu allanngoriartorneranut tunngasunik sammisaqarnerulernissani takorloorsinnaavaa.
Pinngortitaleriffik Sermilillu
Olav isumaqarpoq siunissami inuusuttut Tasiilameersut sapaatip akunneranik sivisussuseqartumik Pinngortitaleriffimmeereeraangamik ilisimatusarnermut tunngasunik ilinniagaqalernissaminnik soqutigisaqarnerulerumaartut.
-Ammassallip Kangerluani Sermilimmilu misissueqataanissannut tunngatillugu soqutiginninnerulerpunga.
Suliniut postdoc’imik Narissa Bax’imik ingerlanneqarpoq, taassumalu misissugarivaa immami qeqquaqarfiit qanoq CO2mik iijoraatigisarnersut.
-Narissa Bax suleqatigalugu nuanneqaaq, Olav nuakkami suli kakkilertallattaagaluarluni oqarpoq.
Narissa’llumi Sermilimmi, Ammassallillu kangerluani qeqqussat qanoq CO2mik iijoraatiginerat qanoq pingaaruteqartiginersoq misissugassarivaa.