Immap naqqa nalunaarsorneqassaaq Saqqummersinneqarfia 08.01.2015
Allattoq: PeMi
Pinngortitaleriffik Islandimi, Savalimmiuni, Norgemi, Canadami USA-milu ilisimatusarfeqarfiit peqatigalugit immap naqqata uumassuseqassusiata qanoq issusianillu ingerlaavartumik malinnaaffiginninniarluni misissueriaatsimik ineriartortitsisoqarnissaanik aningaasaliiffigitippoq. Aningaasaliinermi siunertaavoq atlantikup avannaani nunat imartaasa naqqinik misissuisarnerni minnerpaamik piumasaqaataasartussanik aalajangersaanissat. Misissueriaasissatut ineriartortinneqartussaq nunat atlantikup avannaaniittut akimorlugit aalisarnikkut, pinngortitap avatangiisillu aqutsivigineqarnerini ilisimasanik paasissutissaatinillu assigiissakkanik pigisaqalernermik tunngavissiissaaq. Taamaalilluni paasissutissaatit aalisarnermik ingerlataqartunit pisortallu aqutsiveqarfiinit sulinerni atortussatut pigineqalissallutik.
Maannaagallartoq Norge kisartaavoq imartami killeqarfimmi iluani immap naqqanik misissuisarnernik aaqqissuussaasunik ingerlataqartuusoq. Nunatta imartaata naqqa uumasoqassusialu aaqqissuussamik ilisimatuussutsikkullu tunngaveqartumik suli maannamut misissuiffigineqarnikuunngilaq. Taamaattumik kilisaatersorluni qalorsuarnik immap naqqani kalittarnerit aammalu uuliasiorluni ingerlataqartarnerit sunniutigisinnaasaat maannamut nalileruminaallutik. Tamannalu tassa iliuuseqarfiginiarneqarpoq.
”Immap naqqa uumassuseqassutsip ataqatigiinneranut tamarmut pingaaruteqarpoq. Tamaani uumasuaqqat aalisakkanut, timmissanut imaanilu miluumasunut uumassutissaqartitsisuupput pingaarutillit. Aamma immap naqqa uumasoqatigiiaarpassuarnut uumaffiuvoq, taamaattumillu imaani nerisaqaqatigiiaarnermut pingaaruteqarluinnartuulluni. Issittumi uumasut saaneqangitsut nalunaarsorneqarsimasut 4.000-t 90 %-ii immap naqqani uumasuupput, taamaattumillu immap naqqa pingaaruteqartorujussuuvoq. Tamaani uumassusillit ilaat mianerineqartariaqartut soorlu koralit nillertormiut aammalu pupiit uumasuusut ukiuni kingulliunerusuni eqqumaffigineqarnerulernikuupput, Pinngortitaleriffimmi seniorforsker Martin E. Blicher nassuiaavoq.
Suliniut aalisarnermik susassaqartut qanimut suleqatigalugit ingerlanneqarpoq, taakku nunatsinni raajat MSC-meqqilerniarneqarnerannut atatillugu paasissutissanik katersaqangaatsiareersimapput. Uani pineqarlutik aamma Aalisarnermut Naalakkersuisoqarfimmi, Pinngortitaleriffimmilu Aalisakkanut Qalerualinnullu Immikkoortortaqarfimmi aammalu Silap Pissusianik Ilisimatusarfimmi sulisut suleqataasimanerat. Tassami taama angusaqarniarnermi nunatta piumasaqaaterpaalussuit naammassereersimasariaqarsimavai, MSC-millu meqqilikkat attatiinnarneqassappata piumasaqaatit allat naammassineqartariaqassapput – tamatumunnga ilaalluni ilisimatuussutsikkut tunngaveqartumik immap naqqata uumasuisalu nalunaarsorneqarsimanerat. Taamaattumillu nunatsinni siunissami aalisarnikkut avatangiisitigullu piujuartitsinermik aammalu uumassuseqassutsip tamarmiulluni ataqatigiinneranik tunngaveqartumik aqutsinermi immap naqqata nalunaarsorneqarsimanissaa ataavartumillu misissuiffigineqartarnissaa qitiusumik pingaaruteqartoq.
Pinngortitaleriffimmeersut naatsorsuutigaat immap naqqanik misissuisarnerit ukiumoortumik misissuisarnernut allanut taputartuullugit ingerlanneqartarnissaat.
Nunanut suleqatigiittussanut nunat avannarlerneersunut aningaasaliisuupput Nordatlantisk Samarbejde (www.NORA.fo), Nordisk Ministerråd aamma Sustainable Fisheries Greenland. Ilisimatusartartut suliniummi suleqataasut Issittumi Siunnersuisooqatigiit ataani CAFF-imi taassumalu ataani CBMP – Circumpolar Biodiversity Monitoring Program – ataani sulisitaapput.
Upernaviup avannaatungaani immap naqqani uumassusillit assigiinngitsut assilineqarnerat. Assiliisoq: Martin E. Blicher
Itinerusumik paasisaqarusunnermi attavigisassaq: Pinngortitaleriffiup Silap Pissusianik Ilisimatusarfiani seniorforsker Martin E. Blicher oqarasuaat 36 12 00 imal. mail: mabl@remove-this.natur.gl
