Saarullinnut tunngatillugu paasisaqarnerulernissamut Pinngortitaleriffik ikioruk Saqqummersinneqarfia 09.10.2018
Assimi: Meqqit arfinillit qaammatialunni imatut saarullinnut ikkunneqarnikuupput. Asseq:Pinngortitaleriffik
Sapaatip akunnerani aggersumi Nuup Kangerluani saarullinniartut eqqumaffigilaassavaat nalunaaqutsiissutit meqqit satellitsikkut nassiussisartut saarullinnut angisuunut uumassusilerisuunit ikkussorneqarsimasut puttallattaalernissaat. Satellitsikkut nassiussisartut meqqit puttallattartut oktobarip 15-ani kaanngartussanngorlugit aaqqitaapput.
Meqqit puttallattartut ukioq manna juunimi ikkussorneqarsimapput naatsorsuutigineqarporlu meqqit puttallattartut kangerlummi puttarusaalissasut sapaatip akunnerata tulliani, saarullinniit kaanngarunik. Meqqi ataaseq apuunneqareerpoq, ningittagarsortup saarullik meqqilik pisarisimagamiuk. Saarulliup uumariaasianut tunngasunik paasissutissanik pingaaruteqartunik meqqit imaqarput. Paasissutissallu taakkua peqassutsimut siunnersuisarnissamut iluaqutaasussaapput. Meqqi ataaseq tunniukkaanni 500 kronenik akissarsisoqarsinnaavoq – taavalu meqqi saarullittaalu ilanngullugu tunniukkaanni 1.000 kronenik akissarsiassaqarsinnaalluni.
Meeqqi puttallartartoq ima isikkoqarpoq. Asseq: Pinngortitaleriffik
Meeqqi puttallartartoq paasissutissarpassuarnik imaqarpoq
Saarulliit meqqilersorneqartarnerat ukiuni kingullerni 100-ni ingerlanneqarsimavoq. Saarulliit 125.000-it piffissap ingerlanerani plastikkimik meqqilerneqartarsimapput taakkunanilu 20.000-it pisarineqaqqissimallutik. Meeqqit taakkua plastikkit saarulleqassutsimut ilisimasaqartitsilersimaqaat, qanoq ingerlaartarnerannut, sumi suffisarnerannut allarpassuarnullu tunngasunik. Aasaq mannalu puttallattartunik meeqqilersuinerit nikeriartitsinerujussuuvoq. Meqqimmi puttallattartut sekundtit tallimakkaarlugit kissassutsimut, itissutsimut qanorlu qaamaneqartigineranut tunngasunik immersuisarput.
Kalaallit Nunaanni aatsaavissuaq saarulliit taamaattunik meqqilersorneqarput, uumasorsiuullu neriuutigaat paasisaqarfigissallugu saarulliit annerit suffereernermi kingorna sumiittarnersut pillugit, qanoq ititigisumiittarnersut qanorlu nillissusilimmiikkumanerusarnersut, kiisalu qanoq ingerlaartarnersut pillugit paasisaqassagamik – Nuup Kangerluaniit anillttarpat? Taamaattoqassappallu qaqugukkut?
Saarulliit ineriartortarnerat pillugu paasissutissanik siunissami atorluarneqarsinnaasunik meqqit imaqartussaapput, taamaalilluni saarulliit silatusaartumik piujuartitsisumillu atorluarneqarnissaannut qulakkeerinneqataasoqassallutik. Ilisimasammi annertunerulerneri pitsaanerusumik siunnersuisinnaalernissamut pingaaruteqartarmata.
Meqqit oktobarip 15aniit saarullinniit kaanngarlutik puttallartussaasut ilaat nassaarerukku 500 kronenik akissarsitinneqartussaavutit. Saarullittaalu ilanngullugu Pinngortitaleriffimmut tunniussiguit 1.000 kronenik akissarsitinneqartussaallutik.
Meqqit paasissutissanik katersisinnaasut Nuup Kangerluani saarullinnut ikkunneqarsimaneri pillugit video isiginnaaruk UANI
