Raajartarineqarsinnaasussat 2021-mi amerlanerulaarsinnaapput Saqqummersinneqarfia 30.10.2020

Kalaallit Nunaata kitaata imartaani 2021-mi raajat 115.000 tonsit aalisarneqarsinnaassapput. Biologit raajartassiissutigineqarsinnaasunik aappaagumut innersuussinerat taamaalilluni ukiormannamut innersuussutigisimasaanniit 5.000 tonsinik qaffanneqarput. Kalaallit Nunaata Kangiani, Tunup imartaani 2021-mi raajartassiissutigineqarsinnaasut 3.000 tonsiupput, siornamut sanilliullugit 1.000 tonsinik amerlanerullutik. Siunnersuineq Naalakkersuisunut tunniunneqareerpoq, taakkuuppullu Kalaallit Nunaata imartaani raajartassiissutit tonsit qassiutinnissaannik aalajangersaasartut.

Kalaallit Nunaata kitaata imartaaniittartut raajat piujuartitsiniarnermik tunngaveqarluni iluaqutigineqarput, aalaakkaasumik inissisimallutik peqarluarlunilu, tamanna ilisimatusartartut naatsorsuutaasa paasinarsisippaat. Taamaattoqarnera aamma biologit misissuisarnerinit inernerusunit, raajarniat nalunaarsuutaannit aammalu qarasaasiaq atorlugu naatsorsuusiani takuneqarsinnaapput. Qeqertarsuup Tunuani raajaqassuseq siornamut sanilliullugu amerleriaateqarsimavoq, 2020-p ingerlanerani appariaateqarujussuarami. Avataanili raajaqassuseq 2019-imut sanilliullugu allannguuteqarsimanngitsoq, avataanilu pissutsit taamaannerat kattukkaanni raajaqassuseq tamakkiisumik isigalugu aalaakkaasumik inissisimavoq.

Raajaqassuseq oqimaassusinngorlugu tamakkiisumik paasiniarneqartarpoq raajarniat nalunaarsuutaannik, paasissutissanik kalinnermi ataatsimi pisarisartakkanit, biologit misissuisarnerinit pisat annertussuserisartagaannit kiisalu saarulliit raajaqassutsimik mangiartuisussat amerlassuserisinnaasaannik tunngaveqartumik naatsorsuusiornertigut missiliorneqartarpoq.

Nunatta Kangiata, Tunup imartaani raajaqassuseq qaffariaateqarsimavoq, piffissami aalajangersimasumi pisarineqartut, aammalu raajaqassutsip ineriartornerisa takutippaat. 2004-li sioqqullugu raajaqartarneratulli raajaqartiginngitsutut nalilerneqarpoq, aalisarneq raajaqassuserlu oqimaassusinngorlugu Tunumi Dorhn Bankep eqqaannaani isorartunngitsumi taamaallaat ingerlanneqarsimammat.

Sukumiinerusumik paasisaqarniaraanni saaffigisassaq:

Aalisakkanut Qalerualinnullu Immikkoortortami ilisimatusartartoq AnnDorte Burmeister, oqarasuaat +299 361200 imal. mail anbu@natur.gl

Siunnersortaaneq AnnDorte Burmeister ullaaq manna ukiup tullissaani raajartassanut siunnersuineq pillugu aalisarnermik inuussutissarsiuteqartunut saqqummiussivoq. Ass.: Pinngortitaleriffik.