Aaveq John pulaarpoq Saqqummersinneqarfia 24.10.2008
27. September 2008 aaveq John kiserliulaarsimagunarami Tunup avannaani Daneborgimi nunamut qaqilluni Siriusikkormiut pulaarsimavai. Immaqa aaveqatai ukioq mannamut allamukareersimasut?
Siriusikkormiut malugisimavaat John qatiggamigut raatiukkut aallakaatitsisuteeraqartoq, seqqumigullu orangeamik 29-mik kisitsisitalimmik normumærke-qartoq. John ilassiulaariarluni imarmut aqqaqqissimavoq.
27. September 2008 aarrip Johnip Siriusikkormiut Tunup avannaani Daneborgimiittut pulaarpai. Assiliisoq Morten H. Gormsen.
Aaveq John Pinngortitaleriffimmiunit ilisarisimaneqarluartuuvoq. Aaveqatini allat peqatigalugit 1999-imi 2001-imilu Sandømi Daneborgip eqqaani ilisimatuujunermit Erik W. Born suleqataanillu ilisimajunnaartinneqariarluni satellitsikkut aallakaatitsissutilerneqarpoq.
2001-imi tuugaavata timaatalu angissusai tunngavigalugit 20-21-nik ukioqassangatinneqarpoq, 1.200 kiilunillu oqimasssuseqassangatinneqarluni. John taamani aarrit qanoq nerisaqartigisarnerannik misissuinermi peqataasoq, John Speakmannimut, University of Aberdeen, Skotlandimeersumut atsiunneqarsimavoq. John 2002, 2003, 2004, 2007, 2008-llu aasaanerani aaveqatinilu Sandømiitut takune-qar-tarsimapput.
2008-p aasaagaa John ilisimatuussutsikkut suleqataaqqippoq. 18. juli immikkoortoqarfimmi pisortap Fernando Ugartep Johnip amianut mattusuumut aallakaatitsissuteerannguaq ikkuppa, Pinngortitaleriffiup aallakaatitsissuteeraq 50 gramminik oqimaassusilik qanoq paasissutissanik nassiussuitigisinnaanersoq paaserusummagu.
18. juli 2008 Johnip Sandømiinnerani amianut aallakaatitsissuteeraq ikkunneqarpoq.
Assilisoq Carsten Egevang.
Mannalu tikillugu ajunngitsumik atuuppoq. Johnip Siriusikkormiut pulaarmagit aallakaatitsissut suli atavoq, aammalu 21. Oktober suli aallakaatitsilluni – rekorditut oqaatigineqarsinnaasumik ullut unnuallu 95-it aallakaatitsissutilerneqarnermi kingorna.
19. oktober aaveq John Clavering Ø-p sineriaata kujataanut ingerlaarpoq, tamaani ikkannertaqarpoq uiloqarfiusumik. Takussutissiami qarsuusat Johnip sumiissusaa tulleriiaarnilersorpaat. Taamaammat Johni nunakkoorsimasutut isikkoqarpasikkaluartoq taamaanngilaq. Sumiissutsit tamarmik plus/minus 1 km-inik isorartussuseqarput.
Amia ajorunnaarpat aallakaatitsissut nammineq katassaaq.
Assiliisoq Fernando Ugarte.
Misissuineq Pinngortitaleriffiup 2009-mi Tunup avannaani aarrinik kisitsinissaanut piareersaatit ilagaat.
