Raajat ikinnerusut 2025imi pisarineqassapput Saqqummersinneqarfia 27.09.2024

Nunatta kitaani raajaqassutsimut biologit siunnersuuneranni erserpoq 2024imut sanilliullugu raajartassarisassat 15.000 tonsinik ikinnerussasut. Taamaasilluni 2025imi nunatta kitaani 80.000 tonsit raajartassiissutigineqarnissaat siunnersuutigineqarpoq. Tunumi 1.000 tonsit raajartassiissutigineqarnissaat siunnersuutigineqarpoq, tassa 2024imut sanilliullugu 1.500 tonsinik ikinnerusussanik. Siunnersuinerit Naalakkersuisunut tunniunneqareerput, nunatsinni qanoq 2025imi raajartassiisoqassanersoq taakkualu inaarutaasumik aalajangiiffigisussaavaat.

Nunatta Kitaani pisassiissutigineqartussatut siunnersuutigineqartut NAFO’mi ilisimatuussutsikkut siunnersuisoqatigiinnit suliaavoq, ukioq mannalu peqassutsimut misissuinerit paasinarsisippaat raajaqassuseq pisarineqartartullu ikiliartortut, ukiunilu kingullerni saarulleqarnerulersimalluni raajartornerusunik. Taamaasilluni raajat toqusut nalinginnaasumik amerlassuserisartagaanniit amerlanerusut ukiup tulliani toqussangatinneqarput.

Tunumi raajaqassuseq 2024imi oqimaassusinngortikkaanni appasinnerusumiippoq, toqusoqartarneratalu amerlanerpaaffigisinnaasaata annertunerpaaffia qaangeqqallugu. Raajaqassutsimik misissuiffiusoq raajarniarfiusorlu ukiuni kingullerni Tunumi Dohrn Banke’p eqqaaniinneruvoq.

Sukumiinerusumik paasisaqarniaraanni attavigisassaq:

Aalisarnermut Qalerualinnullu Immikkoortortaqarfimmi Siunnersortaaneq ilisimatusartorlu AnnDorte Burmeister attavigineqarsinnaavoq tlf. +299 361200kut imaluunniit mail: anbu@natur.gl aqqutigalugit.

Raajartassiissutissanut siunnersuineq 2025imoortoq nuisiguk ugguuna