Saattuarniarfissani pingasuni saattuartassat 2023imi qaffassasut Saqqummersinneqarfia 09.11.2022

Pinngortitaleriffiup siunnersuinermini aallaavigai Sisimiut eqqaanni peqassutsimik misissuinerit, aqutsivinnilu tamani aalisartut pisaminnik nalunaarsuinerineersut paasissutissat.

Qeqertarsuup Tunuani aalisartut nalunaarsugaanni erserpoq ukiuni arlalinni pisat amerliartoraluartut aalaakkaasumik saattuaqartoq, 2023imilu pisarineqartussat 982 tonsit qaangerneqassanngitsut innersuussutigineqarpoq. Siunnersuinermilu 2022imut sanilliussissagaanni innersuussutit qaffasinnerupput siorna 796 tonsiusimagamik.

Aqutsivimmi Sisimiuni Sinerissap qanittuani saattuaqarnera misissuineq tamakkerlugu akunnattumik amerlassusilinniit amerlanerusimapput. 2023imi pisassiissutissat 599 tonsinik amerlanerunnginnissaat innersuussutigineqarpoq, innersuussutaasulli 2022imut sanilliullutik amerlanerupput siorna innersuussutit 547 tonsiusimagamik.

Sisimiut avataanni pisarineqartartut ukiuni kingullerni amerlassusiat appasissimavoq, pullatillu ataatsit pisarisartagaat ikiliartorsimallutik. Peqassutsimik misissuinernik paasissutissat takutippaat saattuaqarneruleriartortoq. Taamaattumillu innersuussutigineqarpoq 2023imi pisarineqartussat sinerissap qanittuani 1.020 tonsit qaangissanngikkaat, tassa 2022imisullu innersuussisoqarluni.

Aqutsivimmi Nuuk-Paamiut-ni aalisartut pisaasa nalunaarsorneqarnerisa takutippaat, sinerissap qanittuani peqassuseq aalaakkaasoq. Avataani annikitsuinnarmik amerleriartoqarsimanissaa takussutissartaqarpoq. Taamaattumik 2023imi sinerissap qanittuani pisarineqartussat 1.020 tonsiusut qaangerneqassanngitsut innersuussutigineqarpoq, tassa 2022misulli siunnersuisoqarluni. Avataani 513 tonsit pisarineqarsinnaanissaat innersuussutigineqarpoq, tassa 2022imut sanilliussissagaanni 200 tonsit missaannik annertunerusussallutik.

Pinngortitaleriffimmiit innersuussutigineqarpoq martsimiit juulip tungaanut saattuarniartoqartalissasoq. Taamaaliornikkut nutaanik pisarineqarsinnaasunik peqartalernissaa qulakkeerneqarsinnaammat, saattuanillu ”aqittunik” pisaqartoqartarnissaa pinaveersimatinneqassammat, saattuammi aqitsut tunisassiornermi atorneqarsinnaaneq ajormata, saattuallu imaanut utertinneqarnertik anigorsinnaaneq ajormassuk.

Sukumiinerusumik paasisaqarniaraanni attavigisassaq:

Aalisakkanut Qalerualinnullu Immikkoortortaqarfimmi siunnersuisuuneq ilisimatusartartorlu, AnnDorte Burmeister, oqarasuaat +299 361200 imaluunniit e-mail anbu@natur.gl.

Kiggiussaq  

Saattuarniartoqartarneranut (Chionoecetes opilio) siunnersuineq ukiut tamakkiallugit suliarineqartarpoq. Saattuaqassuseq ukiumut ataasiarluni nalilersorneqartarpoq siunnersuinerlu tulluarsaaffigineqartarluni, paasissutissat katersukkat allannguuteqarsimaneranik takussutissiinerat aallaavigineqartarluni. Tabel 1-imi 2023imut saattuartassanik siunnersuinermi kisitsisit tonsinngorlugit suliarineqarsimasut takuneqarsinnaapput.

Pinngortitaleriffik Sisimiut eqqaanni sinerissap qanittuani avataanilu peqassutsimik misissuisuaannarpoq. Aqutsiveqarfiit sinnerini saattuarniartartut nalunaarsugaasa paasissutissartaat kisiisa atorlugit peqassutsimik naliliisoqartarpoq. Sinerissap qanittuani sumiiffinni makkunani siunnersuisoqarneq ajorpoq: Upernavik, Maniitsoq-Kangaamiut kiisalu Narsaq-Nunap Isua.

Tabel 1. Saattuarniarneq – siunnersuineq, pisarineqartut aammalu pisassiissutigineqartut ukiuni 2022-2023 (tonsit); ”-” = siunnersuisoqanngilaq; * = 2022imi pisarineqarsimasut killiffii.