Qipoqqat sininnera nalunaarsorneqarsimasoq Saqqummersinneqarfia 25.11.2022
Issittumi arfiviit uumariaasiat paasisaqarfigilluarniarlugu ukiuni qulikkaani arlalinni ilisimatusarfigineqarsimavoq. Ilisimatusartartut Pinngortitalerifimmeersut aamma arfiviit Qeqertarsuup eqqaani misissugaraat.
Arfiviimmi ukiut tamakkiallugit upernaakkut siku aserortileraangat tamaanga takkuttarmata arfiviit misissussallugit pissanganartuaannartut nalunaaqutsersornissaannut periarfissagissaartaqigami. Nalunaaqutsiussat ilagaat taaguutilik Acousonde. Nalunaaqutsiuttagarlu taanna millugutsillugu imaluunniit naalillugu arfivimmut ikkunneqartarpoq ullualunnguillu ikkusimariarluni katakkaangami imaani puttarusaartarluni. Nalunaaqutsiunneqarsimasorlu taanna ilisimatusartartut nassaarisarpaat paasissutissallu katersugai nuuttarlugit.
Acousonden-ip arferup qanoq ititigisumut aqqartarnersoq, eqqaanilu nipit immiuttarpai kiisalu arferup qanoq inissisimanera tredimensionellemik takusinnaasarlugu. Kingulleq atorlugu atorlugu uuttortarneqarsinnaasarpoq arfeq ingerlaarnersoq uninngarusaarnersorluunniit. Arferullu ataatsip imaani uninngarusaarnera arlaleriarlugu nalunaarsorneqarsimavoq, aprilip qiteqqunnerata nalaani nalunaaquttap ulluni marlunni atanerani uninngasaqattaarsimagami. Sukumiinerusumik oqaatigissagaanni arfivik 16-38 meteritut ititigisumi uninngasarsimavoq minutsini 24-iniit 48-it tikillugit sivisussuseqartunik. Piffissamilu tassani arfiviup immap qaavanut anersaariartorneranik kipineqartarsimavoq.
Taamatullu pisarneq qipoqqarni, kigutilissuarni aammalu puisini arlalinni naammattoorneqartarsimavoq, tamannalu tuluttut ”drift dive”-imik taaneqartarpoq, tassa sarfaassiutaa aqqaamanermik taaneqarsinnaalluni. Uumasullu imaani sinikkaangamik taamaattoqartassasorineqarpoq. Allatut oqaatigalugu, ilisimatusartartut Pinngortitaleriffimmeersut nunarsuarmi siulliullutik arfiviup sininnermini ileqqorisartagaanik uuttortaallutillu nalunaarsuisinanasimapput. Arfiviillu sinittarnerat tupinnartuliaanngikkaluartoq taamaattoq arfiviit nalunaaqutserneqareernermik kinguninngua sinilluarsinnaasarnerat ilisimatusartartunut paasillugu iluaqutaavoq.
