Nunatsinni kissaviarsuk ajutumeersimasoq qaangiilluarsimasoq Saqqummersinneqarfia 20.04.2009
Assimi: Kissaviarsuk Nuummi illut ilaanni mitsimasoq. Assiliisoq: Martin Kviesgaard.
Kissaviarsuk nukillaarsimasoq timmisinnaanngitsorlu Nuummi nassaarineqartoq ajorani ukiisimavoq. Kissaviarsuk inuusuttoq Nuup kujatinnguani suli takussaavoq, ilaatigullu aneerasaartarfimmiit nasittoq takussaasarluni. Ungasinngitsukkullu kissaviarsuk taanna kissaviarsummik allamik ilataarsimavoq arnaviaangunartumik. Kissaviarsuup assilineqarneratigut uppernarsineqarpoq kissaviarsuk taannarpiaasoq.
Nalunaaqutaata takutippaa kissaviarsuk una uumasunut perorsaavimmut november 2008 eqqunneqarnikuusoq. Assiliisoq: Martin Kviesgaard.
Novemberimi qaammat qiteqqunnerani qimminik toqoraasartoq Rene Olsen-ip kissaviarsuk nukillaalersoq uumasuusivimmut oqqussimavaa. Kissaviarsuk taanna antennemi mitsimasoq tulukkanik qinngasaarneqartoq takuneqarsimavoq. Rene Olsenip Qernertunnguani takummagu uumasuusivimmi sulisumut Susanne Agnholt Markdalimut tunniussimavaa. Uumasut nakorsaat paasisimavaa kissaviarsuk isikkamigut ajoqusersimasoq kisiannili ajorani. Kissaviarsuk nerisinneqartarsimavoq iluarsimmallu decemberip 14-anni tingisinneqarpoq. Tingisitaannginnermi nalunaaqutserneqarpoq suluilu uuttorneqarmata paasinarsivoq arnaviaasoq. Arnaviaasoq angutivissamit 25-35%-it miss. oqimaannerusarpoq, suluilu takinerusarlutik.
Uumasunut perorsaavimmi nalunaaqutsiineq, december 2008. Assiliisoq: Jens M. Rasmussen.
Kissaviarsuk taanna aninguisitaareenermi kingorna Nuup kujatinnguani suli takussaasarpoq. Nalinginnaasuusimavoq timmissat tigutsillit annikikkaluamik ajoqusersimatillutik nunatsinni uumaniarnerat ajornakusuulersinnaasartoq. Taamaattumik nuannaarnarpoq timmiaq taanna tigutsilik qaqutigoortoq ajorani anignuilluarmat.
Naak kissaviarsuit nunatsinni siammarluarsimagaluarlutik amerlagisassaanngilllat, ilimagineqarporlu piaqqiorsinnaasut 225-it 500-llu akornanniissasut.
Kissaviarsuk inuusuttoq uumasunik perorsaavimmi. Assiliisoq: Susanne Markdal.
Kissaviarsuit siusinnerpaamik 2-nnik ukioqartillutik piaqqiulersinnaasarput, ilimagineqartariaqarporlu kissaaviarsuit nuup kujatinnguaniittut, aappaagu piaqqiorfissaminnik ujarlerumaartut. Kissaviarsuit utoqqaanerusut nunatta kitaata kujasissuaniittut, manna april qaammat qiteqqunnerani mannilioreersimassasut.Uani kissaviarsunnut itinerusumik paasissutissat atuakkit.
Kissaviarsuk piniaqqusaanngilluinnarpoq uumasuutigeqqusaananilu. Kissaviarsummik toqungasumik nassaassagaluaruit Pinngortitaleriffimmut tunniutissavat.
