*Required
*Required
*Required
*Required
*Required
*Required
*Required
*Required
Send
Thank you for your application!
 

Facebookkimiit ilisimatuussutsikkut allaaserisamut

Ilisimatuussutsikkut allaaserisaq kapisilinnut qatigalinnut tunngasoq, Pinngortitaleriffimmi ilisimatusartunit saqqummersinneqaqqammerpoq. Suliarlu Facebookkeqartinnagu iluatsissimanavianngikkaluarpoq

Aalisartup Tasiilaminngaaneersup, Kunuk Abelsenip, aggustimi 2019-imi kapisillit qatigallit pisani Pinngortitaleriffimmut soqutiginassangatillugit saaffiginnissutigai.

– Kapisilinnik qatigalinnik amerlanerusunik suli peqassasoq ilimagigatsigu, Tasiilaminngaanniit saaffiginnittoqarnera aallaavigalugu aalajangerpugut Facebookkikkut ”ujarlerniarluta”, uumasorsiooq, Julius Nielsen, suliamik ataqatigiissaarisuusoq oqaluttuarpoq.

Siornatigut Kalaallit Nunaanni kapisilinnik qatigalinnik nalunaarutiginnittoqareernikuuvoq, siullerpaaq 1969-iminngaanneersuuvoq, ukiunilu kingullerni aammattaaq Pinngortitaleriffimmut nalunaarutiginnittoqartareerluni.

Minnerpaamik arnarluit marluk suallit angusalluillu pingasut kinguaassisaatillit, Nuummiit, Uummannamiit Qaqortullu eqqaanniit, nalunaarutigineqarput. Assiliisoq: Jens Sikemsen.

– 2017-imi 2018-imilu nalunaarutisinikuuvugut, kisiannili Facebookkikkut allatigulluunniit kapisillit qatigallit pillugit paasissutissanik ujartuinikuunata. Taamaammat 2019-imi siornatigumut naleqqiullugu amerlanerulersimanersut oqaatigisinnaanngilarput, taamaallaat nalunaarutisisimasarnerput oqaatigisinnaavarput. 2019-imili Kalaallit Nunaanni kapisillit qatigallit siornatiguminngaarniit amerlanerulersimanissaat ilimanaateqarpoq. Paasissutissaatitsinniilli tamanna naliliiffigisinnaanngikkallarparput, Julius Nielsen nassuiaavoq.

Pinngortitaleriffiup Facebookkikkut qupperneratigut kapisillit qatigallit, Kalaallit Nunaanni sumiiffinni assigiinngitsuniit, tassa Upernavimmiit Qaqortumut, Tasiilamiillu, saaffiginnissutit katillugit 84-it nalunaarutigineqarput. Taakkunani 76-it 2019-imeersuupput, arfineq-pingasullu 2013-imiit 2018-imeersuullutik. Ataaseq Nuup kangerluata eqqaani, Kalaallit Nunaanni kapisillit (Salmo salar) ilisimaneqartut suffisarfituaanni Kapisillit kuuaneersuuvoq. Kapisilinni kapisillit Kalaallit Nunaanni uumasuni mianerisariallit allattorsimaffianni ”mianerisarialittut” allattukkanut ilaavoq.

Toornerit tungujortut sumi pisaqartoqarsimaneranik takutitsipput, Kapisillinilu pisaqarfik aappaluttumik takutinneqarluni. Tigusiffik: Nielsen J, Rosing-Asvid A, Meire L, Nygaard R. Widespread occurrence of pink salmon (Oncorhynchus gorbuscha) throughout Greenland coastal waters. J Fish Biol. 2020;1–3.

Europa avannarleq tamakkerlugu kapisilik qatigalik uumasoqatiminut ajoqusiisinnaasutut isigineqarpoq, ukiunilu aggersuni annerusumik siammarternerulersimanissaa ilimagineqarluni. Pinngortitaleriffimmilu ilisimatusartut kapisillit qatigallit kapisilinnut Kapisilinniittunut annertuumik ajoqusiisinnaasutut nalilerpaat.

Julius Nielsenilu piffissami aggersumi kapisilinnut qatigalinnut tunngasumik Facebookkikkut ujartueqqinniarluni pilersaaruteqarpoq. Periusermi paasissutissanik sukkasuumik katersiniarnermi pitsaalluinnartuummat.

–  Kapisillit qatigallit Kalaallit Nunaanni qanoq atsigisumik siaruaassimanerannik takutitsisumik paasissutissanik allatut katersisimasinnaanavianngikkaluarpugut. Allatummi misissuissagutta pisariullunilu piffissamik annertuumik atuinarpallaarsimassagaluarami, Julius Nielsen, pisumut innuttaasunit peqataaffigineqarluarsimasumut naggasiilluni oqarpoq.

Asseq una Tasiilamiit nassiunneqartoq Kalaallit Nunaanni kapisilinnik qatigalinnik takunnittoqarsimanasualugu ujartuilernermut aallarniisuuvoq. Assiliisoq: Kunuk Abelsen.

 

Itinerusumik paasisaqassagaanni attavissaq: Julius Nielsen. Email:  juni@natur.gl

 

Ilisimatuussutsikkut allaaserisaq uani atuaruk.

Kapisilik pillugu uani atuarit.